nigah-o-dil pe koi chha gaya to kya hoga

nigāh-o-dil pe koī chhā gayā to kyā hogā

maiñ apne aap se uktā gayā to kyā hogā

baḌhā ke uns vo Thukrā gayā to kyā hogā

sukūñ ke parde meñ taḌpā gayā to kyā hogā

nibāhnā mujhe aatā to hai gunāhoñ kā

ḳhudā ke sāmne ghabrā gayā to kyā hogā

qazā ke baa'd to zahmat na hogī jiine kī

qazā se pahle dil uktā gayā to kyā hogā

jhijak rahī hai kalī khil ke muskurāne se

palaT ke duur yahāñ aa gayā to kyā hogā

dahak rahā hai jahannam mirī tavaqqo' par

ḳhudā ko mujh pe taras aa gayā to kyā hogā

maiñ ḳhud se duur huuñ us ko qarīb pā ke 'adīl'

agar vo aur qarīb aa gayā to kyā hogā

nigah-o-dil pe koi chha gaya to kya hoga

main apne aap se ukta gaya to kya hoga

baDha ke uns wo Thukra gaya to kya hoga

sukun ke parde mein taDpa gaya to kya hoga

nibahna mujhe aata to hai gunahon ka

KHuda ke samne ghabra gaya to kya hoga

qaza ke ba'd to zahmat na hogi jine ki

qaza se pahle dil ukta gaya to kya hoga

jhijak rahi hai kali khil ke muskurane se

palaT ke dur yahan aa gaya to kya hoga

dahak raha hai jahannam meri tawaqqo' par

KHuda ko mujh pe taras aa gaya to kya hoga

main KHud se dur hun us ko qarib pa ke 'adil'

agar wo aur qarib aa gaya to kya hoga