ek chehre ko musalsal sochta rahta hun main

ek chehre ko musalsal sochtā rahtā huuñ maiñ

mahfiloñ meñ in dinoñ ḳhāmosh sā rahtā huuñ maiñ

detā rahtā hai sadā.eñ kār-e-duniyā 'ishq meñ

aa rahā huuñ aa rahā huuñ Tāltā rahtā huuñ maiñ

hañste rahte haiñ ġharīboñ ke dukhoñ par ahl-e-zar

be-hisoñ ko ḳhāmushī se dekhtā rahtā huuñ maiñ

likh diyā hai us ne qismat meñ mirī dukh nā-tamām

jism so jaatā hai merā jāgtā rahtā huuñ maiñ

hans paḌūñ to bhiig jaatī haiñ mirī āñkheñ 'fahīm'

qahqahoñ ko chashm-e-nam se dekhtā rahtā huuñ maiñ

kaT hī jaatī hai shab-e-tanhā.ī bhī merī 'fahīm'

aap apne aap se hī boltā rahtā huuñ maiñ

ek chehre ko musalsal sochta rahta hun main

mahfilon mein in dinon KHamosh sa rahta hun main

deta rahta hai sadaen kar-e-duniya 'ishq mein

aa raha hun aa raha hun Talta rahta hun main

hanste rahte hain gharibon ke dukhon par ahl-e-zar

be-hison ko KHamushi se dekhta rahta hun main

likh diya hai us ne qismat mein meri dukh na-tamam

jism so jata hai mera jagta rahta hun main

hans paDun to bhig jati hain meri aankhen 'fahim'

qahqahon ko chashm-e-nam se dekhta rahta hun main

kaT hi jati hai shab-e-tanhai bhi meri 'fahim'

aap apne aap se hi bolta rahta hun main