bad-hawas-o-be-qarar-o-ajiz-o-muztar uTha

bad-havās-o-be-qarār-o-'ājiz-o-muztar uThā

aap ke pahlū meñ jo baiThā vo dil kho kar uThā

tauba us but ko ba-jā.e huur māñgā maiñ ne kab

mujh pe ye pesh-e-ḳhudā tūfāñ sar-e-mahshar uThā

hazrat-e-pīr-e-muġhāñ kā faiz-e-sohbat dekhnā

jab maiñ baiThā paḌh ke mā'nī-e-ḳhat-e-sāġhar uThā

maiñ ne kholā bhī garebāñ aur gardan bhī jhukī

tujh ko kyā hai fikr ulaT kar āstīñ ḳhanjar uThā

un hasīnān-e-jahāñ meñ mere vaqt-e-vāpsīñ

baiThā jo hañs hañs ke bālīñ par vo ro ro kar uThā

ai 'fasāhat' she'r-goī kā hameñ kyā lutf ho

bazm-e-'ālam se latāfat sā suḳhan-gustar uThā

bad-hawas-o-be-qarar-o-'ajiz-o-muztar uTha

aap ke pahlu mein jo baiTha wo dil kho kar uTha

tauba us but ko ba-jae hur manga main ne kab

mujh pe ye pesh-e-KHuda tufan sar-e-mahshar uTha

hazrat-e-pir-e-mughan ka faiz-e-sohbat dekhna

jab main baiTha paDh ke ma'ni-e-KHat-e-saghar uTha

main ne khola bhi gareban aur gardan bhi jhuki

tujh ko kya hai fikr ulaT kar aastin KHanjar uTha

un hasinan-e-jahan mein mere waqt-e-wapsin

baiTha jo hans hans ke baalin par wo ro ro kar uTha

ai 'fasahat' she'r-goi ka hamein kya lutf ho

bazm-e-'alam se latafat sa suKHan-gustar uTha