wufur-e-shauq mein tishna-labi ki baat na ho

vufūr-e-shauq meñ tishna-labī kī baat na ho

huzūr-e-husn koī be-ḳhudī kī baat na ho

kisī kā zikr zabāñ par na kis tarah aa.e

ki chāñd dil meñ ho aur chāñdnī kī baat na ho

agar kisī kī mohabbat kā paas hai kuchh bhī

to dard-o-yās meñ bhī tīrgī kī baat na ho

bharam hai 'ishq kā is meñ ki dil kī dil meñ rahe

hazār dard baḌhe be-kalī kī baat na ho

pilā.e jā mire saaqī magar lihāz rahe

ki bazm-e-mai meñ kahīñ be-ḳhudī kī baat na ho

laboñ pe mehr-e-ḳhushī ho nazar meñ hasrat ho

huzūr-e-dost ġham-e-zindagī kī baat na ho

chaman meñ aa.e koī to kahāñ ye mumkin hai

ḳhirām-e-nāz ho aur kaj-ravī kī baat na ho

mafar isī meñ ġhamoñ se yahī hai ḳhuddārī

ki zulm-o-jaur meñ bhī be-kasī kī baat na ho

'matīn' ḳhud ko sañbhālo bhī hosh meñ aao

ḳhud-āgahī hai ki ḳhud-āgahī kī baat na ho

wufur-e-shauq mein tishna-labi ki baat na ho

huzur-e-husn koi be-KHudi ki baat na ho

kisi ka zikr zaban par na kis tarah aae

ki chand dil mein ho aur chandni ki baat na ho

agar kisi ki mohabbat ka pas hai kuchh bhi

to dard-o-yas mein bhi tirgi ki baat na ho

bharam hai 'ishq ka is mein ki dil ki dil mein rahe

hazar dard baDhe be-kali ki baat na ho

pilae ja mere saqi magar lihaz rahe

ki bazm-e-mai mein kahin be-KHudi ki baat na ho

labon pe mehr-e-KHushi ho nazar mein hasrat ho

huzur-e-dost gham-e-zindagi ki baat na ho

chaman mein aae koi to kahan ye mumkin hai

KHiram-e-naz ho aur kaj-rawi ki baat na ho

mafar isi mein ghamon se yahi hai KHuddari

ki zulm-o-jaur mein bhi be-kasi ki baat na ho

'matin' KHud ko sanbhaalo bhi hosh mein aao

KHud-agahi hai ki KHud-agahi ki baat na ho