چراغ لاکھ جلیں تیرگی نہیں جاتی

چراغ لاکھ جلیں تیرگی نہیں جاتی

شب فراق کی وحشت کبھی نہیں جاتی

لبوں کے جام پلائے تھے اس پری وش نے

زمانے بیت گئے بے خودی نہیں جاتی

گزر گئے ہیں کئی سال اس سے بچھڑے ہوئے

ہماری آنکھ سے لیکن نمی نہیں جاتی

خمیر میرا یہ کس دشت سے اٹھایا گیا

لبوں سے کیوں یہ مرے تشنگی نہیں جاتی

گزر تو جاتا ہوں اس کی گلی سے تھام کے دل

خیال و خواب سے اس کی گلی نہیں جاتی

چراغ جہد مسلسل جلا کے دیکھ لیا

مگر نصیب کی تیرہ شبی نہیں جاتی

پٹک کے دیکھا ہے دیوار پر بھی سر کو فہیمؔ

مگر دماغ سے شوریدگی نہیں جاتی