hujum-e-be-kasi ko wajh-e-lutf-e-be-karan paya

hujūm-e-be-kasī ko vaj.h-e-lutf-e-be-karāñ paayā

ki ham ne aaj us nā-mehrbāñ ko mehrbāñ paayā

magar thā rang bazm-e-yās meñ nairang-e-'ālam kā

kisī ko sar-nigūñ dekhā kisī ko shādmāñ paayā

sitam samjhe hue the ham tirī be-e'tinā.ī ko

magar jab ġhaur se dekhā to ik lutf-e-nihāñ paayā

na pā sakte kabhī pāband rah kar qaid-e-hastī meñ

so ham ne be-nishāñ ho kar tujhe o be-nishāñ paayā

hañsī 'ibrat bahut jab rang-e-gul kī be-sabātī ne

chaman meñ 'andalīb-e-sāda-dil ko shādmāñ paayā

na jaa.e koī merī vaz'-e-rusvā par ki ai 'hasrat'

kamāl-e-‘āshiqī ne mujh ko yaktā-e-zamāñ paayā

hujum-e-be-kasi ko wajh-e-lutf-e-be-karan paya

ki hum ne aaj us na-mehrban ko mehrban paya

magar tha rang bazm-e-yas mein nairang-e-'alam ka

kisi ko sar-nigun dekha kisi ko shadman paya

sitam samjhe hue the hum teri be-e'tinai ko

magar jab ghaur se dekha to ek lutf-e-nihan paya

na pa sakte kabhi paband rah kar qaid-e-hasti mein

so hum ne be-nishan ho kar tujhe o be-nishan paya

hansi 'ibrat bahut jab rang-e-gul ki be-sabaati ne

chaman mein 'andalib-e-sada-dil ko shadman paya

na jae koi meri waz'-e-ruswa par ki ai 'hasrat'

kamal-e-‘ashiqi ne mujh ko yakta-e-zaman paya