bekasi ki taswiren sarKHushi ki taswiren

bekasī kī tasvīreñ sarḳhushī kī tasvīreñ

ham ne donoñ dekhī haiñ zindagī kī tasvīreñ

tīrgī ke aivāñ bhī pur-fareb haiñ kitne

har taraf haiñ āvezāñ raushnī kī tasvīreñ

dekhte haiñ jab bhī ham ruuh kaañp jaatī hai

dostī ke parde meñ dushmanī kī tasvīreñ

vaqt ke dhuñdalkoñ meñ ghir ke rah gayā insāñ

kitnī dhuñdlī dhuñdlī haiñ aadmī kī tasvīreñ

muskurātī sub.hoñ kī bhairvīñ kā kyā kahnā

dil meñ gungunātī haiñ rāgnī kī tasvīreñ

shahr-e-husn meñ aksar baam par nazar aa.iiñ

DabDabā.ī āñkhoñ meñ dil-kashī kī tasvīreñ

ġharq-e-mai nazar aa.e jab bhī bāda-kash 'muztar'

phir ga.iiñ nigāhoñ meñ tishnagī kī tasvīreñ

bekasi ki taswiren sarKHushi ki taswiren

hum ne donon dekhi hain zindagi ki taswiren

tirgi ke aiwan bhi pur-fareb hain kitne

har taraf hain aawezan raushni ki taswiren

dekhte hain jab bhi hum ruh kanp jati hai

dosti ke parde mein dushmani ki taswiren

waqt ke dhundalkon mein ghir ke rah gaya insan

kitni dhundli dhundli hain aadmi ki taswiren

muskuraati subhon ki bhairwin ka kya kahna

dil mein gungunati hain ragni ki taswiren

shahr-e-husn mein aksar baam par nazar aain

DabDabai aankhon mein dil-kashi ki taswiren

gharq-e-mai nazar aae jab bhi baada-kash 'muztar'

phir gain nigahon mein tishnagi ki taswiren