kai ahbab hain jin se taaruf tak nahin hai

ka.ī ahbāb haiñ jin se ta'āruf tak nahīñ hai

magar guftār meñ bū-e-takalluf tak nahīñ hai

vo merī milkiyat hai aur maiñ be-dast-o-pā huuñ

kisī bhī chiiz par merā tasarruf tak nahīñ hai

mujhe mā'lūm hai vo be-vafā hai aur phir bhī

use dil meñ basāne par ta.assuf tak nahīñ hai

ḳhushī ye hai ki us ke hoñT marham ke liye haiñ

agarche zaḳhm dene meñ talattuf tak nahīñ hai

visāl-o-hijr kī tafhīm aisī hai ki jaise

hayāt-o-maut meñ bāham tarāduf tak nahīñ hai

'ajab haivāniyat kā raqs karte bheḌiye haiñ

kisī kī jaan lene meñ tavaqquf tak nahīñ hai

hazāroñ mushkileñ dar-pesh rahtī haiñ 'sahar' ko

zabāñ par bā-vajūd is baat ke uf tak nahīñ hai

kai ahbab hain jin se ta'aruf tak nahin hai

magar guftar mein bu-e-takalluf tak nahin hai

wo meri milkiyat hai aur main be-dast-o-pa hun

kisi bhi chiz par mera tasarruf tak nahin hai

mujhe ma'lum hai wo be-wafa hai aur phir bhi

use dil mein basane par tassuf tak nahin hai

KHushi ye hai ki us ke honT marham ke liye hain

agarche zaKHm dene mein talattuf tak nahin hai

visal-o-hijr ki tafhim aisi hai ki jaise

hayat-o-maut mein baham taraduf tak nahin hai

'ajab haiwaniyat ka raqs karte bheDiye hain

kisi ki jaan lene mein tawaqquf tak nahin hai

hazaron mushkilen dar-pesh rahti hain 'sahar' ko

zaban par ba-wajud is baat ke uf tak nahin hai