tere shahr-e-rang-o-bu mein KHauf bhi kuchh kam nahin

tere shahr-e-rang-o-bū meñ ḳhauf bhī kuchh kam nahīñ

chhatriyāñ hāthoñ meñ haiñ bārish kā jab mausam nahīñ

tere dar se pā rahe haiñ vo masīhā kā ḳhitāb

jin ke hāthoñ meñ namak hai zaḳhm kā marham nahīñ

jang-nāma likhne vaalo naam kyā doge hameñ

laḌ rahe haiñ zindagī se haath meñ parcham nahīñ

jānte haiñ āñsuoñ kī qadr-o-qīmat ḳhuub ham

dil meñ hai maujoñ kī shorish aañkh phir bhī nam nahīñ

yuuñ to hai maujūd sūraj phir bhī ye andher kyā

niiñd hai kirnoñ pe taarī sub.h kā 'ālam nahīñ

ḳhushbuoñ kī tarh guzro be-ḳhatar baḌhte chalo

ye diloñ ke rāste haiñ in meñ pech-o-ḳham nahīñ

ik hayāt-e-nau chhupī hai karbalā kī raah meñ

karbalā rāh-e-'amal hai manzil-e-mātam nahīñ

she'riyat miltī nahīñ ab tere she'roñ meñ 'alī'

ruk ga.ī haiñ sūīyāñ terī ghaḌī meñ dam nahīñ

tere shahr-e-rang-o-bu mein KHauf bhi kuchh kam nahin

chhatriyan hathon mein hain barish ka jab mausam nahin

tere dar se pa rahe hain wo masiha ka KHitab

jin ke hathon mein namak hai zaKHm ka marham nahin

jang-nama likhne walo nam kya doge hamein

laD rahe hain zindagi se hath mein parcham nahin

jaante hain aansuon ki qadr-o-qimat KHub hum

dil mein hai maujon ki shorish aankh phir bhi nam nahin

yun to hai maujud suraj phir bhi ye andher kya

nind hai kirnon pe tari subh ka 'alam nahin

KHushbuon ki tarh guzro be-KHatar baDhte chalo

ye dilon ke raste hain in mein pech-o-KHam nahin

ek hayat-e-nau chhupi hai karbala ki rah mein

karbala rah-e-'amal hai manzil-e-matam nahin

she'riyat milti nahin ab tere she'ron mein 'ali'

ruk gai hain suiyan teri ghaDi mein dam nahin