tere aane ki bahut dhum machi hai barish

tere aane kī bahut dhuum machī hai bārish

kahīñ uljhan kahīñ logoñ meñ ḳhushī hai bārish

us ke bin zaḳhm har ik buuñd se paayā maiñ ne

jaise paanī nahīñ patthar kī huī hai bārish

mere mahbūb ko mahbūb yahī mausam hai

is liye bhī mujhe mahbūb rahī hai bārish

hai mirī jaan mizāj aap kā mausam kī tarah

kabhī sardī kabhī garmī to kabhī hai bārish

un ko hālāt ne majbūr kiyā kahne par

kachche ghar vaale jo kahte haiñ burī hai bārish

kaash vo terī tarah lauT ke aa jaa.e kabhī

jis tarah lauT ke tū aane lagī hai bārish

tere aane se hī pahchān milī hai us ko

phir se lagne lagā bastī meñ nadī hai bārish

yuuñ kiyā ham ko bhī hālāt ke tūfāñ ne judā

jis tarah tujh ko havā le ke uḌī hai bārish

gum-shuda bachche ke milne kī ḳhushī kī mānand

ab kisānoñ ko ḳhabar terī milī hai bārish

tere aane se hai imkān ki dhul jaa.e ġhubār

ka.ī rishtoñ pe yahāñ dhuul jamī hai bārish

us kī yādoñ kī ghaTā chhā.ī to 'gauhar' barse

yā'nī ash'ār kī phir mujh pe huī hai bārish

tere aane ki bahut dhum machi hai barish

kahin uljhan kahin logon mein KHushi hai barish

us ke bin zaKHm har ek bund se paya main ne

jaise pani nahin patthar ki hui hai barish

mere mahbub ko mahbub yahi mausam hai

is liye bhi mujhe mahbub rahi hai barish

hai meri jaan mizaj aap ka mausam ki tarah

kabhi sardi kabhi garmi to kabhi hai barish

un ko haalat ne majbur kiya kahne par

kachche ghar wale jo kahte hain buri hai barish

kash wo teri tarah lauT ke aa jae kabhi

jis tarah lauT ke tu aane lagi hai barish

tere aane se hi pahchan mili hai us ko

phir se lagne laga basti mein nadi hai barish

yun kiya hum ko bhi haalat ke tufan ne juda

jis tarah tujh ko hawa le ke uDi hai barish

gum-shuda bachche ke milne ki KHushi ki manand

ab kisanon ko KHabar teri mili hai barish

tere aane se hai imkan ki dhul jae ghubar

kai rishton pe yahan dhul jami hai barish

us ki yaadon ki ghaTa chhai to 'gauhar' barse

ya'ni ash'ar ki phir mujh pe hui hai barish