teri KHushbu se jo KHushbu si uDa karti hai

terī ḳhushbū se jo ḳhushbū sī uḌā kartī hai

zikr sadiyoñ se usī bū kā sabā kartī hai

tere kūche kī havā jab bhī milā kartī hai

dil kī āvāra-mizājī kā gila kartī hai

raqs karte haiñ tire pahlū meñ sab maslak-e-‘ishq

sub.h-e-qāmat jo tirī bheñT chaḌhā kartī hai

terā sar sajde meñ hai jab se mire siine par

bandagī mere vasīle se du'ā kartī hai

tere chehre kī tilāvat hai ujāloñ kā 'ilāj

chāñdnī dho ke tire paaoñ piyā kartī hai

muskurāhaT ko sikhātī hai salīqe 'fātir'

ik kalī jo tire hoñToñ pe khilā kartī hai

teri KHushbu se jo KHushbu si uDa karti hai

zikr sadiyon se usi bu ka saba karti hai

tere kuche ki hawa jab bhi mila karti hai

dil ki aawara-mizaji ka gila karti hai

raqs karte hain tere pahlu mein sab maslak-e-‘ishq

subh-e-qamat jo teri bhenT chaDha karti hai

tera sar sajde mein hai jab se mere sine par

bandagi mere wasile se du'a karti hai

tere chehre ki tilawat hai ujalon ka 'ilaj

chandni dho ke tere paon piya karti hai

muskurahaT ko sikhati hai saliqe 'fatir'

ek kali jo tere honTon pe khila karti hai