jab se tere KHayal aae hain

jab se tere ḳhayāl aa.e haiñ

dil meñ kitne savāl aa.e haiñ

is se pahle ki ḳhvāhisheñ chubhtīñ

dil se saarī nikāl aa.e haiñ

niiñd aa.ī thī ham se milne ko

phir bahāne se Taal aa.e haiñ

jis ne jitne 'urūj dekhe haiñ

us pe utne zavāl aa.e haiñ

ik samundar ko dil dikhāyā hai

us ko hairat meñ Daal aa.e haiñ

justujū meñ sukūñ kī nikle the

le ke vāpas malāl aa.e haiñ

ḳhud ko dariyā samajhne vaale the

un ko qatre meñ Dhaal aa.e haiñ

ik anā thī ki raakh ho na sakī

varna ham bhī niDhāl aa.e haiñ

jab se tere KHayal aae hain

dil mein kitne sawal aae hain

is se pahle ki KHwahishen chubhtin

dil se sari nikal aae hain

nind aai thi hum se milne ko

phir bahane se Tal aae hain

jis ne jitne 'uruj dekhe hain

us pe utne zawal aae hain

ek samundar ko dil dikhaya hai

us ko hairat mein Dal aae hain

justuju mein sukun ki nikle the

le ke wapas malal aae hain

KHud ko dariya samajhne wale the

un ko qatre mein Dhaal aae hain

ek ana thi ki rakh ho na saki

warna hum bhi niDhaal aae hain