aaj malbus mein hai kaisi thakan ki KHushbu

aaj malbūs meñ hai kaisī thakan kī ḳhushbū

raat bhar jaagī huī jaise dulhan kī ḳhushbū

pairahan merā magar us ke badan kī ḳhushbū

us kī tartīb hai ek ek shikan kī ḳhushbū

uḌ ke pahuñchegī jahāñ tak mire fan kī ḳhushbū

saath jā.egī kisī rashk-e-chaman kī ḳhushbū

qāmat-e-she'r kī zebā.ī kā 'ālam mat pūchh

mehrbāñ jab se hai us sarv-badan kī ḳhushbū

mauja-e-gul ko abhī izn-e-takallum na mile

paas aatī hai kisī narm-suḳhan kī ḳhushbū

'āriz-e-gul ko chhuā thā ki dhanak sī bikhrī

kis qadar shoḳh hai nannhī sī kiran kī ḳhushbū

zikr shāyad kisī ḳhurshīd-badan kā bhī kare

kū-ba-kū phailī huī mere gahan kī ḳhushbū

kis ne zanjīr kiyā hai ram-e-āhū-chashmāñ

nik.hat-e-jāñ hai unheñ dasht-o-daman kī ḳhushbū

is asīrī meñ bhī har saañs ke saath aatī hai

sehn-e-zindāñ meñ unheñ dasht-e-vatan kī ḳhush-bū

aaj malbus mein hai kaisi thakan ki KHushbu

raat bhar jagi hui jaise dulhan ki KHushbu

pairahan mera magar us ke badan ki KHushbu

us ki tartib hai ek ek shikan ki KHushbu

uD ke pahunchegi jahan tak mere fan ki KHushbu

sath jaegi kisi rashk-e-chaman ki KHushbu

qamat-e-she'r ki zebai ka 'alam mat puchh

mehrban jab se hai us sarw-badan ki KHushbu

mauja-e-gul ko abhi izn-e-takallum na mile

pas aati hai kisi narm-suKHan ki KHushbu

'ariz-e-gul ko chhua tha ki dhanak si bikhri

kis qadar shoKH hai nannhi si kiran ki KHushbu

zikr shayad kisi KHurshid-badan ka bhi kare

ku-ba-ku phaili hui mere gahan ki KHushbu

kis ne zanjir kiya hai ram-e-ahu-chashman

nikhat-e-jaan hai unhen dasht-o-daman ki KHushbu

is asiri mein bhi har sans ke sath aati hai

sehn-e-zindan mein unhen dasht-e-watan ki KHush-bu