zindan-e-ehtiyat se uTh kar chale kahan

zindān-e-ehtiyāt se uTh kar chale kahāñ

kis tarh keh sakoge ki 'sādiq' luTe kahāñ

simTā hai jab se dāman-e-ārā.ish-e-ḳhayāl

naqsh-o-nigār-e-shauq ke vo silsile kahāñ

tai kī haiñ gard-bād kī mānind manzileñ

sho'la-fishāñ thā dasht-e-vafā baiThte kahāñ

jab bhī kahīñ chhiḌī samar-e-ārzū kī baat

yaad aa gayā mujhe mire baazū kaTe kahāñ

ye soch kar kuchh aur bhī chamke haiñ zaḳhm-e-shauq

nāvak-fagan ko zid thī ki dekhūñ lage kahāñ

guzrā koī sabā kī tarah paas se magar

ab dīd-e-bāz-gasht ke bhī hausle kahāñ

ab un kī yaad se bhī na apnī ḳhabar mile

mauj-e-havā-e-shauq batā aa ga.e kahāñ

sub.h-e-azal kā nuur thī us bazm kī fazā

ham rū-shanās-e-zulmat-e-shab bhī hue kahāñ

ek ek mauj-e-reg meñ chamke jabīn-e-dost

dasht-e-talab meñ koī ruke to ruke kahāñ

zād-e-najāt-o-hashr ke munkir nahīñ magar

aksar ye sochte haiñ ki laa.e ga.e kahāñ

donoñ jahān gosh-bar-āvāz haiñ 'nasīm'

ḳhāna-ḳharāb aaj tire lab sile kahāñ

zindan-e-ehtiyat se uTh kar chale kahan

kis tarh keh sakoge ki 'sadiq' luTe kahan

simTa hai jab se daman-e-araish-e-KHayal

naqsh-o-nigar-e-shauq ke wo silsile kahan

tai ki hain gard-baad ki manind manzilen

sho'la-fishan tha dasht-e-wafa baiThte kahan

jab bhi kahin chhiDi samar-e-arzu ki baat

yaad aa gaya mujhe mere bazu kaTe kahan

ye soch kar kuchh aur bhi chamke hain zaKHm-e-shauq

nawak-fagan ko zid thi ki dekhun lage kahan

guzra koi saba ki tarah pas se magar

ab did-e-baz-gasht ke bhi hausle kahan

ab un ki yaad se bhi na apni KHabar mile

mauj-e-hawa-e-shauq bata aa gae kahan

subh-e-azal ka nur thi us bazm ki faza

hum ru-shanas-e-zulmat-e-shab bhi hue kahan

ek ek mauj-e-reg mein chamke jabin-e-dost

dasht-e-talab mein koi ruke to ruke kahan

zad-e-najat-o-hashr ke munkir nahin magar

aksar ye sochte hain ki lae gae kahan

donon jahan gosh-bar-awaz hain 'nasim'

KHana-KHarab aaj tere lab sile kahan