ummiden the lagae hue shah-sawar se

ummīdeñ the lagā.e hue shah-savār se

matla' magar aTā rahā gard-o-ġhubār se

thamne lagī thī nabz-e-zamān-o-makān bhī

uTThā thā aisā nuur hī tārīk ġhaar se

parvāz kī havas meñ paroñ ko jalā diyā

aage bhī ik fazā hai shab-e-kam-'iyār se

ham ne sukūt-e-shab meñ sune haiñ vo mo'jize

jo harf ban na paa.e zabān-e-sharār se

jo bhī milā milā tirī āvāz oḌh kar

sab āshnā mile tire lutf-e-shi'ār se

ik qatra-e-haqīr jo dariyā huā hai aaj

ye martaba milā use tark-e-vaqār se

vo āshnā bhī kab huā apne jamāl se

jab dil guzar gayā nafas-e-musta’ār se

apne nafas ke sho'le se paidā kiyā chaman

kuchh yuuñ rihā.ī paa.ī hai mauj-e-bahār se

ummiden the lagae hue shah-sawar se

matla' magar aTa raha gard-o-ghubar se

thamne lagi thi nabz-e-zaman-o-makan bhi

uTTha tha aisa nur hi tarik ghaar se

parwaz ki hawas mein paron ko jala diya

aage bhi ek faza hai shab-e-kam-'iyar se

hum ne sukut-e-shab mein sune hain wo mo'jize

jo harf ban na pae zaban-e-sharar se

jo bhi mila mila teri aawaz oDh kar

sab aashna mile tere lutf-e-shi'ar se

ek qatra-e-haqir jo dariya hua hai aaj

ye martaba mila use tark-e-waqar se

wo aashna bhi kab hua apne jamal se

jab dil guzar gaya nafas-e-musta’ar se

apne nafas ke sho'le se paida kiya chaman

kuchh yun rihai pai hai mauj-e-bahaar se