shola-e-dard hai ki naghma-saz

sho'la-e-dard hai ki naġhma-sāz

zindagī kā hai kaun sā andāz

maiñ ki huuñ ik fusūn-e-ḳhāmoshī

tū ki hai ek sho’la-e-āvāz

saaz sab tere ham-navā-o-rafīq

bāñsurī kī fuġhāñ mirī dam-sāz

dard ke silsile tamannā.eñ

husn kab ho sakā harīf-e-niyāz

qaaf

giit kam-tar laboñ pe aa.e haiñ

go musalsal rahā hai dil ko gudāz

kabhī nā-kāmī-e-tamannā se

TuuT kar rah ga.ī mirī āvāz

kabhī kānoñ kī ajnabiyyat se

thartharātā rahā ḳhayāl kā saaz

qaaf

paikar-e-rang hai gulāb kā phuul

mere dil ke liye par-e-parvāz

e'tibār-e-fusūn-e-rang se hai

merī taḳh.īl mā.il-e-tag-o-tāz

intizār-e-shikast-e-rang se hai

merī āñkhoñ meñ ik ḳharāba-e-nāz

har nazar meñ haqīqatoñ kā libās

har adā meñ fusūn-e-rang-e-majāz

qaaf

husn par jo nigāh paḌtī hai

saath laatī hai ik nayā andāz

jaise tār-e-nigāh kī gardish

gaah parda hai gaah parda-e-sāz

kabhī har raushnī tirā nairang

kabhī har sāhirī mirā andāz

shahr ke sab nigār-ḳhānoñ meñ

DhūñDhtā huuñ jo ek ḳhāka-e-nāz

naqsh saare ulajhne lagte haiñ

nikhar aatā hai jab tirā andāz

ye bhī achchhā huā ki sūrat-gar

sunñe paa.e na vo fasāna-e-nāz

merī bazm-e-ḳhayāl-o-gosh meñ jo

thartharātā hai misl-e-parda-e-sāz

iltifāt-e-nigāh se 'jābir'

aaj khul kar huā navā-pardāz

sho'la-e-dard hai ki naghma-saz

zindagi ka hai kaun sa andaz

main ki hun ek fusun-e-KHamoshi

tu ki hai ek sho’la-e-awaz

saz sab tere ham-nawa-o-rafiq

bansuri ki fughan meri dam-saz

dard ke silsile tamannaen

husn kab ho saka harif-e-niyaz

qaf

git kam-tar labon pe aae hain

go musalsal raha hai dil ko gudaz

kabhi na-kaami-e-tamanna se

TuT kar rah gai meri aawaz

kabhi kanon ki ajnabiyyat se

thartharaata raha KHayal ka saz

qaf

paikar-e-rang hai gulab ka phul

mere dil ke liye par-e-parwaz

e'tibar-e-fusun-e-rang se hai

meri taKHil mail-e-tag-o-taz

intizar-e-shikast-e-rang se hai

meri aankhon mein ek KHaraba-e-naz

har nazar mein haqiqaton ka libas

har ada mein fusun-e-rang-e-majaz

qaf

husn par jo nigah paDti hai

sath lati hai ek naya andaz

jaise tar-e-nigah ki gardish

gah parda hai gah parda-e-saz

kabhi har raushni tera nairang

kabhi har sahiri mera andaz

shahr ke sab nigar-KHanon mein

DhunDhta hun jo ek KHaka-e-naz

naqsh sare ulajhne lagte hain

nikhar aata hai jab tera andaz

ye bhi achchha hua ki surat-gar

sunne pae na wo fasana-e-naz

meri bazm-e-KHayal-o-gosh mein jo

thartharaata hai misl-e-parda-e-saz

iltifat-e-nigah se 'jabir'

aaj khul kar hua nawa-pardaz