mere tarane mere saz ka taaqub hai

mire tarāne mire saaz kā ta'āqub hai

ye nasl-e-nau kī hī āvāz kā ta'āqub hai

pata nahīñ thā vo āvāz merī apnī thī

aur 'arse se usī āvāz kā ta'āqub hai

farishte bhī mirī taḳhlīq ke muḳhālif the

hamesha se mire āġhāz kā ta'āqub hai

mire junūn-e-musalsal kī fikr mat karnā

abhī tirī nigah-e-nāz kā ta'āqub hai

abhī to mahzar-e-hū kī bhī justujū na huī

abhī se dīda-e-ġhammāz kā ta'āqub hai

jo pāk-dāman-o-'isyāñ sarisht haiñ barham

ye husn-e-tafraqa-pardāz kā ta'āqub hai

hai guftagū-e-man-o-tū kā ik tajassus bhī

kahīñ ishāra-e-ham-rāz kā ta'āqub hai

paroñ ko toḌte jaate haiñ jo sabhī taa.ir

isī meñ hasrat-e-parvāz kā ta'āqub hai

na ho sakī hai kisī se bhī nāz-bardārī

sunā hai anjuman-e-nāz kā ta'āqub hai

mere tarane mere saz ka ta'aqub hai

ye nasl-e-nau ki hi aawaz ka ta'aqub hai

pata nahin tha wo aawaz meri apni thi

aur 'arse se usi aawaz ka ta'aqub hai

farishte bhi meri taKHliq ke muKHalif the

hamesha se mere aaghaz ka ta'aqub hai

mere junun-e-musalsal ki fikr mat karna

abhi teri nigah-e-naz ka ta'aqub hai

abhi to mahzar-e-hu ki bhi justuju na hui

abhi se dida-e-ghammaz ka ta'aqub hai

jo pak-daman-o-'isyan sarisht hain barham

ye husn-e-tafraqa-pardaz ka ta'aqub hai

hai guftagu-e-man-o-tu ka ek tajassus bhi

kahin ishaara-e-ham-raaz ka ta'aqub hai

paron ko toDte jate hain jo sabhi tair

isi mein hasrat-e-parwaz ka ta'aqub hai

na ho saki hai kisi se bhi naz-bardari

suna hai anjuman-e-naz ka ta'aqub hai