bujha bhi do dil-e-pur-soz-o-chashm-e-tar ke charagh

bujhā bhī do dil-e-pur-soz-o-chashm-e-tar ke charāġh

ye kis ke vāste raushan rakhe haiñ ghar ke charāġh

musāfiroñ ko to manzil pe yaad bhī na rahā

niDhāl the safar-e-shab se rah-guzar ke charāġh

Dubo hī de na kahīñ chashm-e-ashk-bār hameñ

nazar se chhupne lage ab to bām-o-dar ke charāġh

dhuāñ dhuāñ haiñ mohabbat meñ chashm-o-dil jaise

mire hī siine meñ jalte hoñ shahr bhar ke charāġh

bujhā jo sho'la-e-āvāz to huā mahsūs

hamāre ḳhuun se raushan the naġhma-gar ke charāġh

bahut udaas hai 'tausīf' husn۔e-lāla-o-gul

jalā.e jis tarah koī lahū se bhar ke charāġh

bujha bhi do dil-e-pur-soz-o-chashm-e-tar ke charagh

ye kis ke waste raushan rakhe hain ghar ke charagh

musafiron ko to manzil pe yaad bhi na raha

niDhaal the safar-e-shab se rah-guzar ke charagh

Dubo hi de na kahin chashm-e-ashk-bar hamein

nazar se chhupne lage ab to baam-o-dar ke charagh

dhuan dhuan hain mohabbat mein chashm-o-dil jaise

mere hi sine mein jalte hon shahr bhar ke charagh

bujha jo sho'la-e-awaz to hua mahsus

hamare KHun se raushan the naghma-gar ke charagh

bahut udas hai 'tausif' husn۔e-lala-o-gul

jalae jis tarah koi lahu se bhar ke charagh