pahle to KHub hans ke saraha gaya mujhe

pahle to ḳhuub hañs ke sarāhā gayā mujhe

phir be-ruḳhī ke vaar se maarā gayā mujhe

merī vafā pe un ko nahīñ phir bhī e'tibār

pohñchā vahīñ jahāñ se pukārā gayā mujhe

samjhā nahīñ maiñ 'ishq-o-mohabbat ke pech-o-ḳham

is husn-e-sādgī se satāyā gayā mujhe

zanjīreñ TūTtī ga.iiñ ḳhauf-o-hirās kī

jitnā ḳhabāsatoñ se Darāyā gayā mujhe

de kar ke ik sharaf mujhe insāñ kā dahr meñ

kitne hī imtihāñ se guzārā gayā mujhe

dā've dalīl kar diye munsif ne mustarad

yak-tarfa faisla vo sunāyā gayā mujhe

'irshād' is jahāñ meñ jab ik pal sukūñ nahīñ

phir kis liye zamīñ pe utārā gayā mujhe

pahle to KHub hans ke saraha gaya mujhe

phir be-ruKHi ke war se mara gaya mujhe

meri wafa pe un ko nahin phir bhi e'tibar

pohncha wahin jahan se pukara gaya mujhe

samjha nahin main 'ishq-o-mohabbat ke pech-o-KHam

is husn-e-sadgi se sataya gaya mujhe

zanjiren TuTti gain KHauf-o-hiras ki

jitna KHabasaton se Daraya gaya mujhe

de kar ke ek sharaf mujhe insan ka dahr mein

kitne hi imtihan se guzara gaya mujhe

da'we dalil kar diye munsif ne mustarad

yak-tarfa faisla wo sunaya gaya mujhe

'irshad' is jahan mein jab ek pal sukun nahin

phir kis liye zamin pe utara gaya mujhe