hamare pas the kal tak jo zindagi ki tarah

hamāre paas the kal tak jo zindagī kī tarah

bachā ke guzre haiñ dāman vo ajnabī kī tarah

ab e'tibār kī had se nikal ga.ī hai lagan

vo dil lagāte haiñ har ik se dil-lagī kī tarah

vo chāhte haiñ unheñ ham ḳhudā banā Dāleñ

sulūk karte haiñ jo ham se aadmī kī tarah

nayā zamāna na.ī raushnī na.e insāñ

jahāñ se uTh ga.ī har rasm 'āshiqī kī tarah

hameñ milī hai kisī ke lahū se āzādī

hamārā ḳhuun bhī shāmil ho ab kisī kī tarah

nahīñ hai ġham bhī mirā aap hī ke ġham jaisā

mirī ḳhushī bhī nahīñ aap kī ḳhushī kī tarah

vo baat jis ke liye ġham-zada the ham 'vāsif'

vo baat bhuul ga.ī hai hameñ hañsī kī tarah

hamare pas the kal tak jo zindagi ki tarah

bacha ke guzre hain daman wo ajnabi ki tarah

ab e'tibar ki had se nikal gai hai lagan

wo dil lagate hain har ek se dil-lagi ki tarah

wo chahte hain unhen hum KHuda bana Dalen

suluk karte hain jo hum se aadmi ki tarah

naya zamana nai raushni nae insan

jahan se uTh gai har rasm 'ashiqi ki tarah

hamein mili hai kisi ke lahu se aazadi

hamara KHun bhi shamil ho ab kisi ki tarah

nahin hai gham bhi mera aap hi ke gham jaisa

meri KHushi bhi nahin aap ki KHushi ki tarah

wo baat jis ke liye gham-zada the hum 'wasif'

wo baat bhul gai hai hamein hansi ki tarah