aisi nahin hai baat ki qad apne ghaT gae

aisī nahīñ hai baat ki qad apne ghaT ga.e

chādar ko apnī dekh ke ham ḳhud simaT ga.e

jab haath meñ qalam thā to alfāz hī na the

ab lafz mil ga.e to mire haath kaT ga.e

sandal kā maiñ daraḳht nahīñ thā to kis liye

jitne the ġham ke naag mujhī se lipaT ga.e

baiThe the jab to saare parinde the saath saath

uḌte hī shāḳh se ka.ī samtoñ meñ baT ga.e

ab ham ko shafqatoñ kī ghanī chhāñv kyā mile

jitne the sāya-dār shajar saare kaT ga.e

'sāġhar' kisī ko dekh ke hañsnā paḌā mujhe

duniyā samajh rahī hai mire din palaT ga.e

aisi nahin hai baat ki qad apne ghaT gae

chadar ko apni dekh ke hum KHud simaT gae

jab hath mein qalam tha to alfaz hi na the

ab lafz mil gae to mere hath kaT gae

sandal ka main daraKHt nahin tha to kis liye

jitne the gham ke nag mujhi se lipaT gae

baiThe the jab to sare parinde the sath sath

uDte hi shaKH se kai samton mein baT gae

ab hum ko shafqaton ki ghani chhanw kya mile

jitne the saya-dar shajar sare kaT gae

'saghar' kisi ko dekh ke hansna paDa mujhe

duniya samajh rahi hai mere din palaT gae