درس علم عشق نے اتنا منور کر دیا

درس علم عشق نے اتنا منور کر دیا

ایک ذرہ تھا میں سورج کے برابر کر دیا

ایک تو ان کے تغافل سے بہت عاجز تھا میں

آئنوں نے حال میرا بد سے بد تر کر دیا

آن گھیرا ایک دن آوارگی نے بھی مجھے

جب محبت نے مرا احساس پتھر کر دیا

کس نے یہ پردہ ہٹایا شاعری کی اوٹ میں

کیوں کسی کی عیب پوشی کو اجاگر کر دیا

کم سے کم اب آپ تو میرا ہنر پہچانئے

میں صدف ہی رہ گیا کتنوں کو گوہر کر دیا

جانتے ہیں ہم کہ وہ احسان مانیں گے نہیں

جن کو آتشؔ نے سراپا عشق میں تر کر دیا