dars-e-‘ilm-e-‘ishq ne itna munawwar kar diya

dars-e-‘ilm-e-‘ishq ne itnā munavvar kar diyā

ek zarra thā maiñ sūraj ke barābar kar diyā

ek to un ke taġhāful se bahut 'ājiz thā maiñ

ā.inoñ ne haal merā bad se bad-tar kar diyā

aan gherā ek din āvārgī ne bhī mujhe

jab mohabbat ne mirā ehsās patthar kar diyā

kis ne ye parda haTāyā shā'irī kī oT meñ

kyuuñ kisī kī 'aib-poshī ko ujāgar kar diyā

kam se kam ab aap to merā hunar pahchāniye

maiñ sadaf hī rah gayā kitnoñ ko gauhar kar diyā

jānte haiñ ham ki vo ehsān māneñge nahīñ

jin ko 'ātish' ne sarāpā 'ishq meñ tar kar diyā

dars-e-‘ilm-e-‘ishq ne itna munawwar kar diya

ek zarra tha main suraj ke barabar kar diya

ek to un ke taghaful se bahut 'ajiz tha main

aainon ne haal mera bad se bad-tar kar diya

aan ghera ek din aawargi ne bhi mujhe

jab mohabbat ne mera ehsas patthar kar diya

kis ne ye parda haTaya sha'iri ki oT mein

kyun kisi ki 'aib-poshi ko ujagar kar diya

kam se kam ab aap to mera hunar pahchaniye

main sadaf hi rah gaya kitnon ko gauhar kar diya

jaante hain hum ki wo ehsan manenge nahin

jin ko 'atish' ne sarapa 'ishq mein tar kar diya