taKHayyul par kisi ke chha rahe hain

taḳhayyul par kisī ke chhā rahe haiñ

bahāreñ husn kī dikhlā rahe haiñ

qayāmat har qadam par Dhā rahe haiñ

nayā jaadū jagāte aa rahe haiñ

shabāb aayā liye kaif-o-masarrat

qadam un ke bahakte jā rahe haiñ

nigāhoñ meñ surūr-o-kaif-o-mastī

piye haiñ aur pilāte jā rahe haiñ

shabāb un kā sarāpā mehr-e-tābāñ

nigāhoñ ko pasīne aa rahe haiñ

nigāheñ chaar un se kis tarah hoñ

nazar nīchī kiye vo aa rahe haiñ

'matīn' un se nahīñ mumkin takallum

shabāb-e-nau pe vo itrā rahe haiñ

taKHayyul par kisi ke chha rahe hain

bahaaren husn ki dikhla rahe hain

qayamat har qadam par Dha rahe hain

naya jadu jagate aa rahe hain

shabab aaya liye kaif-o-masarrat

qadam un ke bahakte ja rahe hain

nigahon mein surur-o-kaif-o-masti

piye hain aur pilate ja rahe hain

shabab un ka sarapa mehr-e-taban

nigahon ko pasine aa rahe hain

nigahen chaar un se kis tarah hon

nazar nichi kiye wo aa rahe hain

'matin' un se nahin mumkin takallum

shabab-e-nau pe wo itra rahe hain