shab-e-nashat ba-uzr-e-qudum-e-yar baras

shab-e-nashāt ba-'uzr-e-qudūm-e-yār baras

kabhī to Dhang se ai abr-e-nau-bahār baras

havā ke raag pe hai terā shor taal kī Dor

jo baar baar zarūrat ho baar baar baras

is aarzū meñ ki ik raat vo bhī hoñ tū bhī

abad kī god meñ kaaTe haiñ tiin chaar baras

shahoñ ke qasr to shādāb haiñ bahar mausam

kahīñ ba-pās-e-gadāyān-e-rah-guzār baras

tujhe qasam mirī mizhgān-e-ġham kī abr-e-karam

bayād-e-mahfil-e-yārān-o-bazm-e-yār baras

vo kafash-hā-e-zar-afshāñ vo āñchaloñ ke nishāñ

barā.e-zīnat-e-ḳhūbān-e-tarh-dār baras

kalā.iyoñ kī vo sham'eñ vo phuul se chehre

barā.e-māh jabīnān-e-gul-'ezār baras

baras ki gard-e-kudūrat diloñ se dhul jaa.e

ba-jam'-e-ḳhātir-e-ahbāb-e-ġham-gusār baras

zamāna kahtā hai ab ḳhār-o-ḳhas kā haq pahchān

barū-e-dasht-o-bayābān-o-kohsār baras

kisī ke saqf-o-dar-o-bām ko haqīr na jaan

ba-kāḳh-e-kohna-o-imlāk-e-zar-nigār baras

ġhazal 'azīz' kī misra' 'azīz' kā 'ābid'

baras baras ke din ai abr-e-nau-bahār baras

shab-e-nashat ba-'uzr-e-qudum-e-yar baras

kabhi to Dhang se ai abr-e-nau-bahaar baras

hawa ke rag pe hai tera shor tal ki Dor

jo bar bar zarurat ho bar bar baras

is aarzu mein ki ek raat wo bhi hon tu bhi

abad ki god mein kaTe hain tin chaar baras

shahon ke qasr to shadab hain bahar mausam

kahin ba-pas-e-gadayan-e-rah-guzar baras

tujhe qasam meri mizhgan-e-gham ki abr-e-karam

bayaad-e-mahfil-e-yaran-o-bazm-e-yar baras

wo kafash-ha-e-zar-afshan wo aanchalon ke nishan

barae-zinat-e-KHuban-e-tarh-dar baras

kalaiyon ki wo sham'en wo phul se chehre

barae-mah jabinan-e-gul-'ezar baras

baras ki gard-e-kudurat dilon se dhul jae

ba-jam'-e-KHatir-e-ahbab-e-gham-gusar baras

zamana kahta hai ab KHar-o-KHas ka haq pahchan

baru-e-dasht-o-bayaban-o-kohsar baras

kisi ke saqf-o-dar-o-baam ko haqir na jaan

ba-kaKH-e-kohna-o-imlak-e-zar-nigar baras

ghazal 'aziz' ki misra' 'aziz' ka 'abid'

baras baras ke din ai abr-e-nau-bahaar baras