raqs-e-bismil hi na tha naghma-e-zanjir bhi tha

raqs-e-bismil hī na thā naġhma-e-zanjīr bhī thā

ab ke zindāñ meñ 'ilāj-e-ġham-e-tā'bīr bhī thā

rā.egāñ ḳhūn-e-shahīdāñ na gayā maqtal meñ

marg-e-amboh se ik jashn-e-hama-gīr bhī thā

yūñhī TuuTā nahīñ be-rahm chaTānoñ kā ġhurūr

dast-e-farhād meñ ik tesha-e-tadbīr bhī thā

tū nahīñ hai to koī sham' nahīñ hai raushan

ab khulā husn tirā ḳhāliq-e-tanvīr bhī thā

'ishq-e-ḳhud.dār ne hoñToñ pe lagā diiñ mohreñ

varna har aah meñ ik sho'la-e-tāsīr bhī thā

jaam kyuuñ toḌ diyā ai shab-e-ġham ke sāthī

kuchh to ye zahr hamāre liye iksīr bhī thā

ab koī baat nahīñ vaqt kī añgḌā.ī meñ

vo kamāñ TuuT ga.ī jis meñ koī tiir bhī thā

chain paayā na kisī daur ke shā'ir ne 'qatīl'

muztarib 'mīr' bhī thā 'ġhālib'-e-dil-gīr bhī thā

raqs-e-bismil hi na tha naghma-e-zanjir bhi tha

ab ke zindan mein 'ilaj-e-gham-e-ta'bir bhi tha

raegan KHun-e-shahidan na gaya maqtal mein

marg-e-amboh se ek jashn-e-hama-gir bhi tha

yunhi TuTa nahin be-rahm chaTanon ka ghurur

dast-e-farhad mein ek tesha-e-tadbir bhi tha

tu nahin hai to koi sham' nahin hai raushan

ab khula husn tera KHaliq-e-tanwir bhi tha

'ishq-e-KHuddar ne honTon pe laga din mohren

warna har aah mein ek sho'la-e-tasir bhi tha

jam kyun toD diya ai shab-e-gham ke sathi

kuchh to ye zahr hamare liye iksir bhi tha

ab koi baat nahin waqt ki angDai mein

wo kaman TuT gai jis mein koi tir bhi tha

chain paya na kisi daur ke sha'ir ne 'qatil'

muztarib 'mir' bhi tha 'ghaalib'-e-dil-gir bhi tha