aankhen malte hue bistar se nikal aaya hun

āñkheñ malte hue bistar se nikal aayā huuñ

kisī mulzim kī tarah ghar se nikal aayā huuñ

dekh saktā na thā yāroñ kī jabīñ par shikneñ

sar jhukā.e hue manzar se nikal aayā huuñ

khil rahe haiñ mirī āñkhoñ pe ka.ī aur aflāk

maiñ ki ab gardish-e-mehvar se nikal aayā huuñ

tū milā hai ki ga.ī 'umr palaT aa.ī hai

kitnā laḌkā sā maiñ andar se nikal aayā huuñ

log dekheñge tire dil se nikalnā merā

devtā ho ke maiñ patthar se nikal aayā huuñ

tīrgī oḌh ke jab so ga.iiñ saarī saḌkeñ

maiñ ThiThurtā huā daftar se nikal aayā huuñ

aankhen malte hue bistar se nikal aaya hun

kisi mulzim ki tarah ghar se nikal aaya hun

dekh sakta na tha yaron ki jabin par shiknen

sar jhukae hue manzar se nikal aaya hun

khil rahe hain meri aankhon pe kai aur aflak

main ki ab gardish-e-mehwar se nikal aaya hun

tu mila hai ki gai 'umr palaT aai hai

kitna laDka sa main andar se nikal aaya hun

log dekhenge tere dil se nikalna mera

dewta ho ke main patthar se nikal aaya hun

tirgi oDh ke jab so gain sari saDken

main ThiThurta hua daftar se nikal aaya hun