teri surat se ayan hai aab-o-tab-e-aftab

terī sūrat se 'ayāñ hai āb-o-tāb-e-āftāb

dekh le jis ne na dekhā ho javāb-e-āftāb

sub.h-dam hotā hai dekho shāh-e-ḳhāvar ḳhema-zan

khiñch ga.ī hai sat.h-e-gardūñ par tanāb-e-āftāb

samt-e-maġhrib haath meñ neze shu'ā'oñ ke liye

kis se laḌne ko chalā afrāsiyāb-e-āftāb

kuchh 'ajab hairat-fazā hai lāla-zār-e-āsmāñ

ye shafaq phūlī huī hai yā gulāb-e-āftāb

jo ki haiñ fayyāz faiz un kā hai vaqf-e-ḳhās-o-‘ām

dekh lo har ek 'ālam faiz-yāb-e-āftāb

ho gayā kī sar-zamīñ kyuuñ kar na rashk-e-āsmāñ

hai yahāñ ik ik hasīñ 'bismil' javāb-e-āftāb

teri surat se 'ayan hai aab-o-tab-e-aftab

dekh le jis ne na dekha ho jawab-e-aftab

subh-dam hota hai dekho shah-e-KHawar KHema-zan

khinch gai hai sath-e-gardun par tanab-e-aftab

samt-e-maghrib hath mein neze shu'a'on ke liye

kis se laDne ko chala afrasiyab-e-aftab

kuchh 'ajab hairat-faza hai lala-zar-e-asman

ye shafaq phuli hui hai ya gulab-e-aftab

jo ki hain fayyaz faiz un ka hai waqf-e-KHas-o-‘am

dekh lo har ek 'alam faiz-yab-e-aftab

ho gaya ki sar-zamin kyun kar na rashk-e-asman

hai yahan ek ek hasin 'bismil' jawab-e-aftab