nazare lutf-o-KHushi ke to be-shumar mile

nazāre lutf-o-ḳhushī ke to be-shumār mile

ye aarzū hī rahī dil ko kuchh qarār mile

ḳhushī kī bazm meñ kyuuñ log ashk-bār mile

khule ye raaz to mujh ko bhī kuchh qarār mile

agar hamāre 'adū ek do haiñ to ġham kyā

qadam qadam pe hameñ dost jāñ-nisār mile

kuchh aise log bhī apne qarīb rahte haiñ

ki jin se dil na milā haath baar baar mile

bichhaḌ gayā huuñ maiñ jin se ba-vaj.h-e-majbūrī

vo phir 'azīz mileñ phir vahī dayār mile

ḳhizāñ-rasīda chaman par nigāh kis kī uThī

yahāñ to jo bhī mile tālib-e-bahār mile

safar ke baa'd maiñ lauTūñ to ye bhī mumkin hai

ki koī mere liye mahv-e-intizār mile

hamārā hissa to gard-e-malāl hai 'kāvish'

kahāñ nasīb masarrat kā ābshār mile

nazare lutf-o-KHushi ke to be-shumar mile

ye aarzu hi rahi dil ko kuchh qarar mile

KHushi ki bazm mein kyun log ashk-bar mile

khule ye raaz to mujh ko bhi kuchh qarar mile

agar hamare 'adu ek do hain to gham kya

qadam qadam pe hamein dost jaan-nisar mile

kuchh aise log bhi apne qarib rahte hain

ki jin se dil na mila hath bar bar mile

bichhaD gaya hun main jin se ba-wajh-e-majburi

wo phir 'aziz milen phir wahi dayar mile

KHizan-rasida chaman par nigah kis ki uThi

yahan to jo bhi mile talib-e-bahaar mile

safar ke ba'd main lauTun to ye bhi mumkin hai

ki koi mere liye mahw-e-intizar mile

hamara hissa to gard-e-malal hai 'kawish'

kahan nasib masarrat ka aabshaar mile