kahin aabshaar sharab ke kahin surKH farsh gulal ke

kahīñ ābshār sharāb ke kahīñ surḳh farsh gulāl ke

kahīñ ḳhushbueñ haiñ baḳhūr kī kahīñ gul khile haiñ kamāl ke

ye maqām 'ishq kā hai jahāñ sabhī ārzūeñ tamām haiñ

na ḳhalish hai ab koī hijr kī na to ḳhvāb hī haiñ visāl ke

tujhe kyā ḳhabar ki maiñ kis qadar tirī sādgī kī asiir huuñ

mirī shā'irī meñ bayāñ haiñ bas tire qisse husn-o-jamāl ke

ye 'urūj aaj milā hai jo na maiñ bhuul kar bhī bhulā sakī

jo guzar ga.e mirī zaat par vahī raat din the zavāl ke

maiñ hamesha hī rahī raah meñ na milīñ kabhī mujhe manzileñ

mire ham-qadam rahe qāfile tirī yaad tere ḳhayāl ke

ye charāġh ġham ke bujhā bhī do ki nashāt-e-sub.h hai aa ga.ī

nahīñ zeb deñge tumheñ 'qamar' ye siyāh rang malāl ke

kahin aabshaar sharab ke kahin surKH farsh gulal ke

kahin KHushbuen hain baKHur ki kahin gul khile hain kamal ke

ye maqam 'ishq ka hai jahan sabhi aarzuen tamam hain

na KHalish hai ab koi hijr ki na to KHwab hi hain visal ke

tujhe kya KHabar ki main kis qadar teri sadgi ki asir hun

meri sha'iri mein bayan hain bas tere qisse husn-o-jamal ke

ye 'uruj aaj mila hai jo na main bhul kar bhi bhula saki

jo guzar gae meri zat par wahi raat din the zawal ke

main hamesha hi rahi rah mein na milin kabhi mujhe manzilen

mere ham-qadam rahe qafile teri yaad tere KHayal ke

ye charagh gham ke bujha bhi do ki nashat-e-subh hai aa gai

nahin zeb denge tumhein 'qamar' ye siyah rang malal ke