hamare sabr ka phal jab milega

hamāre sabr kā phal jab milegā

sukūn is dil ko jākar tab milegā

abhī maiñ huuñ to mujh meñ Duub jaao

na jaane phir ye mauqa' kab milegā

maiñ rāh-e-mā'rifat par chal rahā huuñ

isī raste pe mujh ko rab milegā

mirā hujra hī merī kahkashāñ hai

yahīñ vo māh-rū har shab milegā

tamannā ko sukūñ hogā mayassar

jab un ke lab se jākar lab milegā

usī kī aarzū meñ kū-ba-kū haiñ

kisī din to kisī ko shab milegā

khulegī aap kī fitrat bhī qibla

kabhī jo aap ko mansab milegā

ye aañsū rakh liye haiñ us kī ḳhātir

milegā jab bhī tishna-lab milegā

kisī mahfil kisī duniyā meñ jaao

har ik jā 'ishq kā kartab milegā

yahī dastūr hai duniyā kā 'qaisar'

vafā ko chhoḌ baaqī sab milegā

hamare sabr ka phal jab milega

sukun is dil ko jakar tab milega

abhi main hun to mujh mein Dub jao

na jaane phir ye mauqa' kab milega

main rah-e-ma'rifat par chal raha hun

isi raste pe mujh ko rab milega

mera hujra hi meri kahkashan hai

yahin wo mah-ru har shab milega

tamanna ko sukun hoga mayassar

jab un ke lab se jakar lab milega

usi ki aarzu mein ku-ba-ku hain

kisi din to kisi ko shab milega

khulegi aap ki fitrat bhi qibla

kabhi jo aap ko mansab milega

ye aansu rakh liye hain us ki KHatir

milega jab bhi tishna-lab milega

kisi mahfil kisi duniya mein jao

har ek ja 'ishq ka kartab milega

yahi dastur hai duniya ka 'qaisar'

wafa ko chhoD baqi sab milega