chali hai aarzu-e-dil shikasta-pa abhi Thahro

chalī hai ārzū-e-dil shikasta-pā abhī Thahro

nikal ā.eñge 'unvān-e-junūñ-āsā abhī Thahro

abhī Thahro ki ham arz-e-yaqīñ par ḳhush-gumāñ ābād

zarā barbād ho jaa.eñ ḳhirad-mandā abhī Thahro

falak se guftugū karne ke mausam lauT ā.eñge

ḳhizāñ-parvar zamāna gul khilā.egā abhī Thahro

nazar ḳhīra huī fānūs-e-hairat kī shu'ā'oñ se

ḳhirad sākit qadam zanjīr haiñ goyā abhī Thahro

qasāis kī fasīloñ meñ haqīqat qaid hai lekin

lagā hai jā-ba-jā afsānvī pahra abhī Thahro

taġhayyur 'ain-e-fitrat hai magar majbūr huuñ ai dil

giraftār-e-taḳhayyul hai koī lamha abhī Thahro

jahāñ 'ujlat baratnī thī vahāñ tāḳhīr kī 'salmān'

abad kā fāsla hai ab to kuchh 'arsa abhī Thahro

chali hai aarzu-e-dil shikasta-pa abhi Thahro

nikal aaenge 'unwan-e-junun-asa abhi Thahro

abhi Thahro ki hum arz-e-yaqin par KHush-guman aabaad

zara barbaad ho jaen KHirad-manda abhi Thahro

falak se guftugu karne ke mausam lauT aaenge

KHizan-parwar zamana gul khilaega abhi Thahro

nazar KHira hui fanus-e-hairat ki shu'a'on se

KHirad sakit qadam zanjir hain goya abhi Thahro

qasais ki fasilon mein haqiqat qaid hai lekin

laga hai ja-ba-ja afsanwi pahra abhi Thahro

taghayyur 'ain-e-fitrat hai magar majbur hun ai dil

giraftar-e-taKHayyul hai koi lamha abhi Thahro

jahan 'ujlat baratni thi wahan taKHir ki 'salman'

abad ka fasla hai ab to kuchh 'arsa abhi Thahro