chand ke intizar mein tare

chāñd ke intizār meñ taare

Dūbte jā rahe haiñ bechāre

pūchhte kyā ho vaj.h-e-barbādī

āshiyāñ meñ paḌe the angāre

ham kahāñ zulm-āshnā hote

ham nigāh-e-karam ke the maare

ho ga.ī diid maut se pahle

aaj armāñ nikal ga.e saare

ḳhud to Duube sanam bhī le Duube

shahr meñ aa base the banjāre

hai vahī kushta zinda-e-jāved

ḳhū-e-taslīm jis ko tū maare

aaj ashkoñ ne aabrū rakh lī

yuuñ to 'ushshāq the bahut saare

dil ke TukḌoñ meñ dil salāmat hai

jaise qur.āñ ke ho ga.e paare

aaj 'vāsif-‘alī’ ġhazal-ḳhvāñ haiñ

kal talak the ḳhamosh be-chāre

chand ke intizar mein tare

Dubte ja rahe hain bechaare

puchhte kya ho wajh-e-barbaadi

aashiyan mein paDe the angare

hum kahan zulm-ashna hote

hum nigah-e-karam ke the mare

ho gai did maut se pahle

aaj arman nikal gae sare

KHud to Dube sanam bhi le Dube

shahr mein aa base the banjare

hai wahi kushta zinda-e-jawed

KHu-e-taslim jis ko tu mare

aaj ashkon ne aabru rakh li

yun to 'ushshaq the bahut sare

dil ke TukDon mein dil salamat hai

jaise quran ke ho gae pare

aaj 'wasif-‘ali’ ghazal-KHwan hain

kal talak the KHamosh be-chaare