bahti aankhon se thak kar ke soe hue

bahtī āñkhoñ se thak kar ke so.e hue

ek 'arsa huā ab to ro.e hue

vo namī vo udāsī vo daur aur thā

ik zamāna huā us ko kho.e hue

ek būḌhā daraḳht aaj phir gir gayā

chhāñv se thā jo sab ko piro.e hue

raah taktā rahā apne beToñ kī vo

būḌhe sapnoñ ko kandhe pe Dho.e hue

aao baiTho kahīñ kuchh 'ibādat kareñ

ek muddat huī paap dho.e hue

ai 'musāfir' ye mahfil raqīboñ kī hai

kaise guzroge āñkheñ bhigo.e hue

bahti aankhon se thak kar ke soe hue

ek 'arsa hua ab to roe hue

wo nami wo udasi wo daur aur tha

ek zamana hua us ko khoe hue

ek buDha daraKHt aaj phir gir gaya

chhanw se tha jo sab ko piroe hue

rah takta raha apne beTon ki wo

buDhe sapnon ko kandhe pe Dhoe hue

aao baiTho kahin kuchh 'ibaadat karen

ek muddat hui pap dhoe hue

ai 'musafir' ye mahfil raqibon ki hai

kaise guzroge aankhen bhigoe hue