zat ke karb ko lafzon mein dabae rakkha

zaat ke karb ko lafzoñ meñ dabā.e rakkhā

mez par terī kitāboñ ko sajā.e rakkhā

tū ne ik shaam jo aane kā kiyā thā va.ada

maiñ ne din-rāt charāġhoñ ko jalā.e rakkhā

kis salīqe se ḳhayāloñ ko zabāñ de de kar

mujh ko us shaḳhs ne bātoñ meñ lagā.e rakhā

maiñ vo siitā ki jo lachhman ke hisāroñ meñ rahī

ham vo jogī ki alakh phir bhī jagā.e rakkhā

shāyad aa jaa.e kisī roz vo sajda karne

isī ummīd pe āñchal ko bichhā.e rakkhā

chūḌiyāñ rakh na sakīñ merī namāzoñ kā bharam

phir bhī hāthoñ ko duāoñ meñ uThā.e rakkhā

jaane kyuuñ aa ga.ī phir yaad usī mausam kī

jis ne 'shabnam' ko havāoñ se bachā.e rakkhā

zat ke karb ko lafzon mein dabae rakkha

mez par teri kitabon ko sajae rakkha

tu ne ek sham jo aane ka kiya tha wada

main ne din-raat charaghon ko jalae rakkha

kis saliqe se KHayalon ko zaban de de kar

mujh ko us shaKHs ne baaton mein lagae rakha

main wo sita ki jo lachhman ke hisaron mein rahi

hum wo jogi ki alakh phir bhi jagae rakkha

shayad aa jae kisi roz wo sajda karne

isi ummid pe aanchal ko bichhae rakkha

chuDiyan rakh na sakin meri namazon ka bharam

phir bhi hathon ko duaon mein uThae rakkha

jaane kyun aa gai phir yaad usi mausam ki

jis ne 'shabnam' ko hawaon se bachae rakkha