وہ تیغ ناز کہ گل رنگ ہے لہو کی طرح

وہ تیغ ناز کہ گل رنگ ہے لہو کی طرح

عزیز ہے مجھے اپنی رگ گلو کی طرح

تہی ہیں رند سر میکدہ سبو کی طرح

چراغ کون جلائے مرے لہو کی طرح

چمن نے جب کبھی دیوار بن کے روکا ہے

گزر گیا ہوں میں اک موج رنگ و بو کی طرح

سکھا رہے ہیں وہ آداب میکشی ہم کو

جو میکدے میں چھلکتے رہے سبو کی طرح

بہار میں بھی نہیں کوئی شاخ گل محفوظ

چمن کا حسن ہے مفلس کی آبرو کی طرح

ترے وصال کی خوشبو ترے فراق کا رنگ

مری حیات ہے اک شہر رنگ و بو کی طرح

سکوت پر بھی وہ شاید بٹھائیں گے پہرے

سکوت بھی تو ہے اک جرم گفتگو کی طرح

ہمیں بھی دیکھ کہ ہم زندگی کے صحرا میں

کھلے ہوئے ہیں کسی زخم آرزو کی طرح

جو تو ملے تو ملاقات اپنے آپ سے ہو

تری تلاش میں ہوں اپنی جستجو کی طرح

گزر رہا ہوں اب ان منزلوں سے اے شاعرؔ

ہے آرزو بھی جہاں ترک آرزو کی طرح

کھنچی ہے جب کسی باطل کی تیغ اے شاعرؔ

چمک اٹھی ہے صداقت مرے لہو کی طرح