shayad meri fariyaad sunai nahin deti

shāyad mirī fariyād sunā.ī nahīñ detī

qudarat jo mujhe hukm-e-rihā.ī nahīñ detī

thā pahle bahut shor nihāñ-ḳhāna-e-dil meñ

ab to koī siskī bhī sunā.ī nahīñ detī

ḳhvāboñ kī tijārat meñ yahī ek kamī hai

chaltī hai dukāñ ḳhuub kamā.ī nahīñ detī

har tār-e-nafas hai mut.harrik mutvātir

ruḳhsat hī mujhe naġhma-sarā.ī nahīñ detī

kyā dhund hai ashkoñ kī musallat dil o jaañ par

dekhī huī duniyā bhī dikhā.ī nahīñ detī

chalne ko to sab yaar kamar-basta khaḌe haiñ

jis raah pe chalnā hai sujhā.ī nahīñ detī

kāñToñ pe chalātī hai koī aur hī lazzat

vahshat kā sila ābla-pā.ī nahīñ detī

maiñ qaid-e-mahālāt se dam bhar meñ nikal jā.ūñ

hāsil kī havas mujh ko rihā.ī nahīñ detī

maiñ apnī hī miTTī se banā letā huuñ 'mid.hat'

vo chiiz jo auroñ kī ḳhudā.ī nahīñ detī

shayad meri fariyaad sunai nahin deti

qudarat jo mujhe hukm-e-rihai nahin deti

tha pahle bahut shor nihan-KHana-e-dil mein

ab to koi siski bhi sunai nahin deti

KHwabon ki tijarat mein yahi ek kami hai

chalti hai dukan KHub kamai nahin deti

har tar-e-nafas hai mutharrik mutwatir

ruKHsat hi mujhe naghma-sarai nahin deti

kya dhund hai ashkon ki musallat dil o jaan par

dekhi hui duniya bhi dikhai nahin deti

chalne ko to sab yar kamar-basta khaDe hain

jis rah pe chalna hai sujhai nahin deti

kanTon pe chalati hai koi aur hi lazzat

wahshat ka sila aabla-pai nahin deti

main qaid-e-mahaalat se dam bhar mein nikal jaun

hasil ki hawas mujh ko rihai nahin deti

main apni hi miTTi se bana leta hun 'midhat'

wo chiz jo auron ki KHudai nahin deti