main aa raha tha sitaron pe panw dharte hue

maiñ aa rahā thā sitāroñ pe paañv dharte hue

badan utaar diyā ḳhaak se guzarte hue

jamāl mujh pe ye ik din meñ to nahīñ aayā

hazār aa.ine TuuTe mire sañvarte hue

'ajab nazar se charāġhoñ kī samt dekhā hai

havā ne zīna-e-pindār se utarte hue

ik-ādh jaam to pī hī liyā thā ham ne bhī

ḳhumār-e-ḳhāna-e-duniyā kī sair karte hue

ab āsmān bhī kam paḌ rahe haiñ mere liye

qadam zamīn pe rakkhā thā maiñ ne Darte hue

vahī sitāra sitāroñ kā hukmrāñ Thahrā

laraz rahā thā jo pahlī zaqand bharte hue

maiñ kā.ināt se bāhar nikal gayā yak-dam

'ajīb nashsha thā pahlī uḌaan bharte hue

jahāñ jahāñ bhī mujhe rāste meñ raat aa.ī

maiñ ik charāġh jalātā gayā guzarte hue

maiñ ā.īna thā magar aa.ina kamāl kā thā

hazār 'aks banātā gayā bikharte hue

main aa raha tha sitaron pe panw dharte hue

badan utar diya KHak se guzarte hue

jamal mujh pe ye ek din mein to nahin aaya

hazar aaine TuTe mere sanwarte hue

'ajab nazar se charaghon ki samt dekha hai

hawa ne zina-e-pindar se utarte hue

ik-adh jam to pi hi liya tha hum ne bhi

KHumar-e-KHana-e-duniya ki sair karte hue

ab aasman bhi kam paD rahe hain mere liye

qadam zamin pe rakkha tha main ne Darte hue

wahi sitara sitaron ka hukmran Thahra

laraz raha tha jo pahli zaqand bharte hue

main kainat se bahar nikal gaya yak-dam

'ajib nashsha tha pahli uDan bharte hue

jahan jahan bhi mujhe raste mein raat aai

main ek charagh jalata gaya guzarte hue

main aaina tha magar aaina kamal ka tha

hazar 'aks banata gaya bikharte hue