کس قدر درد کے شب کرتا تھا مذکور ترا

کس قدر درد کے شب کرتا تھا مذکور ترا

وہ ہی بیمار ترا خستۂ و رنجور ترا

بے خبر اب بھی شتابی سے پہنچ ڈرتا ہوں

کشتۂ ہجر نہ ہو یہ کہیں مہجور ترا

یہ نہ آنے کے بہانے ہیں سبھی ورنہ میاں

اتنا تو گھر سے مرے کچھ نہیں گھر دور ترا

نیچی نظروں سے تری ڈرتا ہوں کیا کچھ نہ کریں

دیکھ لینا تو یہاں سب کو ہے منظور ترا

آنکھیں ان روزوں میں سچ کہیو لڑائیں کس سے

بے طرح جھمکے ہے کچھ دیدۂ مخمور ترا

جس کی تو یاری کرے یارئ دو جگ وہ کرے

ناصر ہر دو جہاں ہووے ہے منصور ترا

شش جہت تجھ ستی معمور ہے اللہ اللہ

جھمکے ہے چاروں طرف نام خدا نور ترا