is ka nahin hai gham koi, jaan se agar guzar gae

is kā nahīñ hai ġham koii, jaañ se agar guzar ga.e

dukh kī añdherī raat meñ ham bhī charāġh dhar ga.e

shān-o-shikoh kyā hue, qaisar-o-jam kidhar ga.e

taḳht ulaT ulaT ga.e, taaj bikhar bikhar ga.e

fikr-e-ma.āsh ne sabhī jazboñ ko sard kar diyā

saḌkoñ pe din guzar gayā ho ke niDhāl ghar ga.e

lipTe rahe tamām raat phuul kī pattiyoñ ke saath

dhuup paḌī jo phuul par qatre farār kar ga.e

tundī-e-sail-e-vaqt meñ ye bhī hai koī zindagī

sub.h huī to jī uThe, raat huī to mar ga.e

gard-e-safar meñ kho ga.e, aise hazāroñ rāh-rau

raah meñ jo Thahar ga.e, āñdhiyoñ se jo Dar ga.e

phir bhī kisī ra.iis ke dil kī tarah hai chashm tañg

aap phire haiñ mulk mulk aap nagar nagar ga.e

khil ke raheñge dekhnā chār-sū raushnī ke phuul

raat ke dasht kī taraf naqsh-gar-e-sahar ga.e

ḳhaak meñ terī mil ga.ī 'faiz' ke jism kī ziyā

ab to dayār-e-mahvashāñ qarz tamām utar ga.e

is ka nahin hai gham koi, jaan se agar guzar gae

dukh ki andheri raat mein hum bhi charagh dhar gae

shan-o-shikoh kya hue, qaisar-o-jam kidhar gae

taKHt ulaT ulaT gae, taj bikhar bikhar gae

fikr-e-maash ne sabhi jazbon ko sard kar diya

saDkon pe din guzar gaya ho ke niDhaal ghar gae

lipTe rahe tamam raat phul ki pattiyon ke sath

dhup paDi jo phul par qatre farar kar gae

tundi-e-sail-e-waqt mein ye bhi hai koi zindagi

subh hui to ji uThe, raat hui to mar gae

gard-e-safar mein kho gae, aise hazaron rah-rau

rah mein jo Thahar gae, aandhiyon se jo Dar gae

phir bhi kisi rais ke dil ki tarah hai chashm tang

aap phire hain mulk mulk aap nagar nagar gae

khil ke rahenge dekhna chaar-su raushni ke phul

raat ke dasht ki taraf naqsh-gar-e-sahar gae

KHak mein teri mil gai 'faiz' ke jism ki ziya

ab to dayar-e-mahwashan qarz tamam utar gae