دماغ و دل کی تھکان والا

دماغ و دل کی تھکان والا

کڑا سفر ہے گمان والا

یقین کرنے چلے تو ہو پر

یہ راستا ہے ڈھلان والا

لگی ہے آگ اپنے دشت دل میں

ڈرا ہوا ہے مچان والا

ہیں سامنے وہ سوال آنکھیں

مجھے ہے ڈر امتحان والا

زمیں بناتے ہوئے یقیناً

نشہ میں تھا آسمان والا

سپردگی اور اتنی جلدی

مزہ تو ہو کھینچ تان والا

ادب کی خدمت کا سوچتا ہوں

بتاؤ کوئی دکان والا

سبھی ہوئے ناامید مجھ سے

یہ وقت ہے اطمینان والا

میں اک تو سردار وہ بھی شاعر

پھر اس پہ اردو زبان والا