dard ke mausam ka kya hoga asar anjaan par

dard ke mausam kā kyā hogā asar anjān par

dosto paanī kabhī ruktā nahīñ Dhalvān par

aaj tak us ke ta.āqub meñ bagūle haiñ ravāñ

abr kā TukḌā kabhī barsā thā registān par

maiñ jo parbat par chaḌhā vo aur ūñchā ho gayā

āsmāñ jhuktā nazar aayā mujhe maidān par

kamre ḳhālī ho ga.e sāyoñ se āñgan bhar gayā

Dūbte sūraj kī kirneñ jab paḌīñ dālān par

ab yahāñ koī nahīñ hai kis se bāteñ kījiye

ye magar chup-chāp sī tasvīr ātish-dān par

aaj bhī shāyad koī phūloñ kā tohfa bhej de

titliyāñ mañDlā rahī haiñ kāñch ke gul-dān par

bas chale to apnī uryānī ko us se Dhāñp luuñ

niilī chādar sī tanī hai jo khule maidān par

vo ḳhamoshī uñgliyāñ chaTḳhā rahī thī ai 'shakeb'

yā ki būñdeñ baj rahī thiiñ raat raushan-dān par

dard ke mausam ka kya hoga asar anjaan par

dosto pani kabhi rukta nahin Dhalwan par

aaj tak us ke taaqub mein bagule hain rawan

abr ka TukDa kabhi barsa tha registan par

main jo parbat par chaDha wo aur uncha ho gaya

aasman jhukta nazar aaya mujhe maidan par

kamre KHali ho gae sayon se aangan bhar gaya

Dubte suraj ki kirnen jab paDin dalan par

ab yahan koi nahin hai kis se baaten kijiye

ye magar chup-chap si taswir aatish-dan par

aaj bhi shayad koi phulon ka tohfa bhej de

titliyan manDla rahi hain kanch ke gul-dan par

bas chale to apni uryani ko us se Dhanp lun

nili chadar si tani hai jo khule maidan par

wo KHamoshi ungliyan chaTKHa rahi thi ai 'shakeb'

ya ki bunden baj rahi thin raat raushan-dan par