charagh KHud hi bujhaya bujha ke chhoD diya

charāġh ḳhud hī bujhāyā bujhā ke chhoḌ diyā

vo ġhair thā use apnā banā ke chhoḌ diyā

hazār chehre haiñ maujūd aadmī ġhā.eb

ye kis ḳharābe meñ duniyā ne lā ke chhoḌ diyā

maiñ apnī jaañ meñ use jazb kis tarah kartā

use gale se lagāyā lagā ke chhoḌ diyā

maiñ jā chukā huuñ mire vāste udaas na ho

maiñ vo huuñ tū ne jise muskurā ke chhoḌ diyā

kisī ne ye na batāyā ki fāsla kyā hai

har ek ne mujhe rasta dikhā ke chhoḌ diyā

hamāre dil meñ hai kyā jhāñk kar na dekh sake

ḳhud apnī zaat se parda uThā ke chhoḌ diyā

vo terā rog bhī hai aur tirā ilaaj bhī hai

usī ko DhūñD jise tañg aa ke chhoḌ diyā

vo anjuman meñ milā bhī to us ne baat na kī

kabhī kabhī koī jumla chhupā ke chhoḌ diyā

rakhūñ kisī se tavaqqo.a to kyā rakhūñ 'shahzād'

ḳhudā ne bhī to zamīñ par girā ke chhoḌ diyā

charagh KHud hi bujhaya bujha ke chhoD diya

wo ghair tha use apna bana ke chhoD diya

hazar chehre hain maujud aadmi ghaeb

ye kis KHarabe mein duniya ne la ke chhoD diya

main apni jaan mein use jazb kis tarah karta

use gale se lagaya laga ke chhoD diya

main ja chuka hun mere waste udas na ho

main wo hun tu ne jise muskura ke chhoD diya

kisi ne ye na bataya ki fasla kya hai

har ek ne mujhe rasta dikha ke chhoD diya

hamare dil mein hai kya jhank kar na dekh sake

KHud apni zat se parda uTha ke chhoD diya

wo tera rog bhi hai aur tera ilaj bhi hai

usi ko DhunD jise tang aa ke chhoD diya

wo anjuman mein mila bhi to us ne baat na ki

kabhi kabhi koi jumla chhupa ke chhoD diya

rakhun kisi se tawaqqoa to kya rakhun 'shahzad'

KHuda ne bhi to zamin par gira ke chhoD diya