charagh-e-zindagi hoga farozan hum nahin honge

charāġh-e-zindagī hogā farozāñ ham nahīñ hoñge

chaman meñ aa.egī fasl-e-bahārāñ ham nahīñ hoñge

javāno ab tumhāre haath meñ taqdīr-e-ālam hai

tumhīñ hoge faroġh-e-bazm-e-imkāñ ham nahīñ hoñge

jiyeñge jo vo dekheñge bahāreñ zulf-e-jānāñ kī

sañvāre jā.eñge gesu-e-daurāñ ham nahīñ hoñge

hamāre Dūbne ke baad ubhreñge na.e taare

jabīn-e-dahr par chhaTkegī afshāñ ham nahīñ hoñge

na thā apnī hī qismat meñ tulū-e-mehr kā jalva

sahar ho jā.egī shām-e-ġharībāñ ham nahīñ hoñge

agar maazī munavvar thā kabhī to ham na the hāzir

jo mustaqbil kabhī hogā daraḳhshāñ ham nahīñ hoñge

hamāre daur meñ Dālīñ ḳhirad ne uljhaneñ lākhoñ

junūñ kī mushkileñ jab hoñgī āsāñ ham nahīñ hoñge

kahīñ ham ko dikhā do ik kiran hī TimTimātī sī

ki jis din jagmagā.egā shabistāñ ham nahīñ hoñge

hamāre baad hī ḳhūn-e-shahīdāñ rañg lā.egā

yahī surḳhī banegī zeb-e-unvāñ ham nahīñ hoñge

charagh-e-zindagi hoga farozan hum nahin honge

chaman mein aaegi fasl-e-bahaaran hum nahin honge

jawano ab tumhaare hath mein taqdir-e-alam hai

tumhin hoge farogh-e-bazm-e-imkan hum nahin honge

jiyenge jo wo dekhenge bahaaren zulf-e-jaanan ki

sanware jaenge gesu-e-dauran hum nahin honge

hamare Dubne ke baad ubhrenge nae tare

jabin-e-dahr par chhaTkegi afshan hum nahin honge

na tha apni hi qismat mein tulu-e-mehr ka jalwa

sahar ho jaegi sham-e-ghariban hum nahin honge

agar mazi munawwar tha kabhi to hum na the hazir

jo mustaqbil kabhi hoga daraKHshan hum nahin honge

hamare daur mein Dalin KHirad ne uljhanen lakhon

junun ki mushkilen jab hongi aasan hum nahin honge

kahin hum ko dikha do ek kiran hi TimTimati si

ki jis din jagmagaega shabistan hum nahin honge

hamare baad hi KHun-e-shahidan rang laega

yahi surKHi banegi zeb-e-unwan hum nahin honge