baiTh jata hun jahan chhanw ghani hoti hai

baiTh jaatā huuñ jahāñ chhāñv ghanī hotī hai

haa.e kyā chiiz ġharīb-ul-vatanī hotī hai

nahīñ marte haiñ to iizā nahīñ jhelī jaatī

aur marte haiñ to paimāñ-shikanī hotī hai

din ko ik nuur barastā hai mirī turbat par

raat ko chādar-e-mahtāb tanī hotī hai

tum bichhaḌte ho jo ab karb na ho vo kam hai

dam nikaltā hai to a.azā-shikanī hotī hai

zinda dar-gor ham aise jo haiñ marne vaale

jīte-jī un ke gale meñ kafanī hotī hai

rut badalte hī badal jaatī hai niyyat merī

jab bahār aatī hai tauba-shikanī hotī hai

ġhair ke bas meñ tumheñ sun ke ye kah uThtā huuñ

aisī taqdīr bhī allāh ġhanī hotī hai

na baḌhe baat agar khul ke kareñ vo bāteñ

bā.is-e-tūl-e-suḳhan kam-suḳhanī hotī hai

luT gayā vo tire kūche meñ dharā jis ne qadam

is tarah kī bhī kahīñ rāhzanī hotī hai

husn vāloñ ko zid aa jaa.e ḳhudā ye na kare

kar guzarte haiñ jo kuchh jī meñ Thanī hotī hai

hijr meñ zahr hai sāġhar kā lagānā muñh se

mai kī jo buuñd hai hiire kī kanī hotī hai

mai-kashoñ ko na kabhī fikr-e-kam-o-besh rahī

aise logoñ kī tabī'at bhī ġhanī hotī hai

huuk uThtī hai agar zabt-e-fuġhāñ kartā huuñ

saañs ruktī hai to barchhī kī anī hotī hai

aks kī un pe nazar aa.ine pe un kī nigāh

do kamāñ-dāroñ meñ nāvak-faganī hotī hai

pī lo do ghūñT ki saaqī kī rahe baat 'hafīz'

saaf inkār se ḳhātir-shikanī hotī hai

baiTh jata hun jahan chhanw ghani hoti hai

hae kya chiz gharib-ul-watani hoti hai

nahin marte hain to iza nahin jheli jati

aur marte hain to paiman-shikani hoti hai

din ko ek nur barasta hai meri turbat par

raat ko chadar-e-mahtab tani hoti hai

tum bichhaDte ho jo ab karb na ho wo kam hai

dam nikalta hai to aaza-shikani hoti hai

zinda dar-gor hum aise jo hain marne wale

jite-ji un ke gale mein kafani hoti hai

rut badalte hi badal jati hai niyyat meri

jab bahaar aati hai tauba-shikani hoti hai

ghair ke bas mein tumhein sun ke ye kah uThta hun

aisi taqdir bhi allah ghani hoti hai

na baDhe baat agar khul ke karen wo baaten

bais-e-tul-e-suKHan kam-suKHani hoti hai

luT gaya wo tere kuche mein dhara jis ne qadam

is tarah ki bhi kahin rahzani hoti hai

husn walon ko zid aa jae KHuda ye na kare

kar guzarte hain jo kuchh ji mein Thani hoti hai

hijr mein zahr hai saghar ka lagana munh se

mai ki jo bund hai hire ki kani hoti hai

mai-kashon ko na kabhi fikr-e-kam-o-besh rahi

aise logon ki tabi'at bhi ghani hoti hai

huk uThti hai agar zabt-e-fughan karta hun

sans rukti hai to barchhi ki ani hoti hai

aks ki un pe nazar aaine pe un ki nigah

do kaman-daron mein nawak-fagani hoti hai

pi lo do ghunT ki saqi ki rahe baat 'hafiz'

saf inkar se KHatir-shikani hoti hai