kis ne sahrā meñ mire vāste rakkhī hai ye chhāñv

dhuup roke hai mirā chāhne vaalā kaisā

kis ne sahra mein mere waste rakkhi hai ye chhanw

dhup roke hai mera chahne wala kaisa

maiñ laakh ise taaza rakhūñ dil ke lahū se

lekin tirī tasvīr ḳhayālī hī rahegī

main lakh ise taza rakhun dil ke lahu se

lekin teri taswir KHayali hi rahegi

maiñ ne dekhā thā sahāre ke liye chāroñ taraf

ki mire paas hī ik haath bhañvar se niklā

main ne dekha tha sahaare ke liye chaaron taraf

ki mere pas hi ek hath bhanwar se nikla

shāyad ab bhī koī sharar baaqī ho 'zeb'

dil kī raakh se aañch aatī hai kam kam sī

shayad ab bhi koi sharar baqi ho 'zeb'

dil ki rakh se aanch aati hai kam kam si

thak gayā ek kahānī sunte sunte maiñ

kyā is kā anjām nahīñ hotā koī

thak gaya ek kahani sunte sunte main

kya is ka anjam nahin hota koi