qurbateñ hote hue bhī fāsloñ meñ qaid haiñ

kitnī āzādī se ham apnī hadoñ meñ qaid haiñ

qurbaten hote hue bhi faslon mein qaid hain

kitni aazadi se hum apni hadon mein qaid hain

kahānī likhte hue dāstāñ sunāte hue

vo so gayā hai mujhe ḳhvāb se jagāte hue

kahani likhte hue dastan sunate hue

wo so gaya hai mujhe KHwab se jagate hue

aur is se pahle ki sābit ho jurm-e-ḳhāmoshī

ham apnī raa.e kā iz.hār karnā chāhte haiñ

aur is se pahle ki sabit ho jurm-e-KHamoshi

hum apni rae ka izhaar karna chahte hain

maiñ ḳhayāl huuñ kisī aur kā mujhe sochtā koī aur hai

sar-e-ā.īna mirā aks hai pas-e-ā.īna koī aur hai

main KHayal hun kisi aur ka mujhe sochta koi aur hai

sar-e-aina mera aks hai pas-e-aina koi aur hai

ham ne to ḳhud se intiqām liyā

tum ne kyā soch kar mohabbat kī

hum ne to KHud se intiqam liya

tum ne kya soch kar mohabbat ki

ā.īna ḳhud bhī sañvartā thā hamārī ḳhātir

ham tire vāste tayyār huā karte the

aaina KHud bhi sanwarta tha hamari KHatir

hum tere waste tayyar hua karte the

mujhe sambhālne meñ itnī ehtiyāt na kar

bikhar na jā.ūñ kahīñ maiñ tirī hifāzat meñ

mujhe sambhaalne mein itni ehtiyat na kar

bikhar na jaun kahin main teri hifazat mein

pukārte haiñ unheñ sāhiloñ ke sannāTe

jo log Duub ga.e kashtiyāñ banāte hue

pukarte hain unhen sahilon ke sannaTe

jo log Dub gae kashtiyan banate hue

tum ne sach bolne kī jur.at kī

ye bhī tauhīn hai adālat kī

tum ne sach bolne ki jurat ki

ye bhi tauhin hai adalat ki

bahut dinoñ meñ kahīñ hijr-e-māh-o-sāl ke ba.ad

rukā huā hai zamāna tire visāl ke ba.ad

bahut dinon mein kahin hijr-e-mah-o-sal ke baad

ruka hua hai zamana tere visal ke baad

ai mire chārāgar tire bas meñ nahīñ mo.āmla

sūrat-e-hāl ke liye vāqif-e-hāl chāhiye

ai mere chaaragar tere bas mein nahin moamla

surat-e-haal ke liye waqif-e-haal chahiye

ḳhāmosh sahī markazī kirdār to ham the

phir kaise bhalā terī kahānī se nikalte

KHamosh sahi markazi kirdar to hum the

phir kaise bhala teri kahani se nikalte

tum to kahte the ki sab qaidī rihā.ī pā ga.e

phir pas-e-dīvār-e-zindāñ rāt-bhar rotā hai kaun

tum to kahte the ki sab qaidi rihai pa gae

phir pas-e-diwar-e-zindan raat-bhar rota hai kaun

mirī raushnī tire ḳhadd-o-ḳhāl se muḳhtalif to nahīñ magar

tū qarīb aa tujhe dekh luuñ tū vahī hai yā koī aur hai

meri raushni tere KHadd-o-KHal se muKHtalif to nahin magar

tu qarib aa tujhe dekh lun tu wahi hai ya koi aur hai

yaad kā zaḳhm bhī ham tujh ko nahīñ de sakte

dekh kis ālam-e-ġhurbat meñ mile haiñ tujh se

yaad ka zaKHm bhi hum tujh ko nahin de sakte

dekh kis aalam-e-ghurbat mein mile hain tujh se

zoroñ pe 'salīm' ab ke hai nafrat kā bahāv

jo bach ke nikal aa.egā tairāk vahī hai

zoron pe 'salim' ab ke hai nafrat ka bahaw

jo bach ke nikal aaega tairak wahi hai

judā.ī bhī na hotī zindagī bhī sahl ho jaatī

jo ham ik dūsre se mas.ala tabdīl kar lete

judai bhi na hoti zindagi bhi sahl ho jati

jo hum ek dusre se masala tabdil kar lete

saa.e galī meñ jāgte rahte haiñ raat bhar

tanhā.iyoñ kī oT se jhāñkā na kar mujhe

sae gali mein jagte rahte hain raat bhar

tanhaiyon ki oT se jhanka na kar mujhe

ahl-e-ḳhirad ko aaj bhī apne yaqīn ke liye

jis kī misāl hī nahīñ us kī misāl chāhiye

ahl-e-KHirad ko aaj bhi apne yaqin ke liye

jis ki misal hi nahin us ki misal chahiye

ye aag lagne se pahle kī bāz-gasht hai jo

bujhāne vāloñ ko ab tak dhuāñ bulātā hai

ye aag lagne se pahle ki baz-gasht hai jo

bujhane walon ko ab tak dhuan bulata hai

kabhī lauT aa.eñ to pūchhnā nahīñ dekhnā unheñ ġhaur se

jinheñ rāste meñ ḳhabar huī ki ye rāsta koī aur hai

kabhi lauT aaen to puchhna nahin dekhna unhen ghaur se

jinhen raste mein KHabar hui ki ye rasta koi aur hai