Sher on Transport

raat thī jab tumhārā shahr aayā

phir bhī khiḌkī to maiñ ne khol hī lī

raat thi jab tumhaara shahr aaya

phir bhi khiDki to main ne khol hi li

sub.h-e-kāzib kī havā meñ dard thā kitnā 'munīr'

rail kī siiTī bajī to dil lahū se bhar gayā

subh-e-kazib ki hawa mein dard tha kitna 'munir'

rail ki siTi baji to dil lahu se bhar gaya

savārī sirf ik utrī hai aur maiñ

bharī gaaḌī meñ tanhā rah gayā huuñ

sawari sirf ek utri hai aur main

bhari gaDi mein tanha rah gaya hun

saath vaalī nishast ḳhālī huī

rāste meñ utar gayā mirā dil

sath wali nishast KHali hui

raste mein utar gaya mera dil

achchhā bhalā ravāñ thā tirī yaad kī taraf

phir yuuñ huā ki rail kā kāñTā badal gayā

achchha bhala rawan tha teri yaad ki taraf

phir yun hua ki rail ka kanTa badal gaya

aap kā is se vāsta khiḌkī se dekhne kā hai

mujh ko to diije rāsta merā to shahr aa gayā

aap ka is se wasta khiDki se dekhne ka hai

mujh ko to dije rasta mera to shahr aa gaya

chāhe apne ghar kā hī garage ho

gaaḌī apnī lock honī chāhiye

chahe apne ghar ka hi garage ho

gaDi apni lock honi chahiye

raat Dhalne ko hai aur āḳhirī gaaḌī vaalā

mujh se kahtā hai ki tujh ko bhī kahīñ jaanā hai

raat Dhalne ko hai aur aaKHiri gaDi wala

mujh se kahta hai ki tujh ko bhi kahin jaana hai

dostī kī chaltī gaaḌī se utar jaate haiñ log

aur apnā muñh bhī aage kī taraf rakhte nahīñ

dosti ki chalti gaDi se utar jate hain log

aur apna munh bhi aage ki taraf rakhte nahin

rail ke zor-o-shor se saarā makāñ laraz gayā

os alag na ho sakī khilte hue gulāb se

rail ke zor-o-shor se sara makan laraz gaya

os alag na ho saki khilte hue gulab se

tumhāre shahr ko jaate ye lāriyoñ vaale

sadā lagāte nahīñ mujh pe tanz karte haiñ

tumhaare shahr ko jate ye lariyon wale

sada lagate nahin mujh pe tanz karte hain

bus kā safar thā zindagī jis meñ sharīk tū bhī thā

jaane kab aañkh lag ga.ī jaane tū kab utar gayā

bus ka safar tha zindagi jis mein sharik tu bhi tha

jaane kab aankh lag gai jaane tu kab utar gaya

vāpsī par dūsrī bus meñ use dekhā gayā

saath vaalī seat par thā vo mirī jaate hue

wapsi par dusri bus mein use dekha gaya

sath wali seat par tha wo meri jate hue

karnā hai safar mujh ko isī bus se laTak kar

jis shahr bhī jaa.e mirī taqdīr bhaTak kar

karna hai safar mujh ko isi bus se laTak kar

jis shahr bhi jae meri taqdir bhaTak kar