Sher on Safar

mujhe ḳhabar thī mirā intizār ghar meñ rahā

ye hādsa thā ki maiñ umr bhar safar meñ rahā

mujhe KHabar thi mera intizar ghar mein raha

ye hadsa tha ki main umr bhar safar mein raha

zindagī yuuñ huī basar tanhā

qāfila saath aur safar tanhā

zindagi yun hui basar tanha

qafila sath aur safar tanha

safar meñ dhuup to hogī jo chal sako to chalo

sabhī haiñ bhiiḌ meñ tum bhī nikal sako to chalo

safar mein dhup to hogi jo chal sako to chalo

sabhi hain bhiD mein tum bhi nikal sako to chalo

hai koī jo batā.e shab ke musāfiroñ ko

kitnā safar huā hai kitnā safar rahā hai

hai koi jo batae shab ke musafiron ko

kitna safar hua hai kitna safar raha hai

ye baat yaad rakheñge talāshne vaale

jo us safar pe ga.e lauT kar nahīñ aa.e

ye baat yaad rakhenge talashne wale

jo us safar pe gae lauT kar nahin aae

go aable haiñ paañv meñ phir bhī ai rahravo

manzil kī justujū hai to jaarī rahe safar

go aable hain panw mein phir bhi ai rahrawo

manzil ki justuju hai to jari rahe safar

kis kī talāsh hai hameñ kis ke asar meñ haiñ

jab se chale haiñ ghar se musalsal safar meñ haiñ

kis ki talash hai hamein kis ke asar mein hain

jab se chale hain ghar se musalsal safar mein hain

apnī sī ḳhaak uḌā ke baiTh rahe

apnā sā qāfila banāte hue

apni si KHak uDa ke baiTh rahe

apna sa qafila banate hue

maiñ akelā hī chalā thā jānib-e-manzil magar

log saath aate ga.e aur kārvāñ bantā gayā

main akela hi chala tha jaanib-e-manzil magar

log sath aate gae aur karwan banta gaya

Dar ham ko bhī lagtā hai raste ke sannāTe se

lekin ek safar par ai dil ab jaanā to hogā

Dar hum ko bhi lagta hai raste ke sannaTe se

lekin ek safar par ai dil ab jaana to hoga

abhī se shikva-e-past-o-buland ham-safro

abhī to raah bahut saaf hai abhī kyā hai

abhi se shikwa-e-past-o-buland ham-safro

abhi to rah bahut saf hai abhi kya hai

safar meñ koī kisī ke liye Thahartā nahīñ

na muḌ ke dekhā kabhī sāhiloñ ko dariyā ne

safar mein koi kisi ke liye Thaharta nahin

na muD ke dekha kabhi sahilon ko dariya ne

na ranj-e-hijrat thā aur na shauq-e-safar thā dil meñ

sab apne apne gunāh kā bojh Dho rahe the

na ranj-e-hijrat tha aur na shauq-e-safar tha dil mein

sab apne apne gunah ka bojh Dho rahe the

maiñ lauTne ke irāde se jā rahā huuñ magar

safar safar hai mirā intizār mat karnā

main lauTne ke irade se ja raha hun magar

safar safar hai mera intizar mat karna

chale the jis kī taraf vo nishān ḳhatm huā

safar adhūrā rahā āsmān ḳhatm huā

chale the jis ki taraf wo nishan KHatm hua

safar adhura raha aasman KHatm hua

musāfirat kā valvala siyāhatoñ kā mashġhala

jo tum meñ kuchh ziyāda hai safar karo safar karo

musafirat ka walwala siyahaton ka mashghala

jo tum mein kuchh ziyaada hai safar karo safar karo

na manziloñ ko na ham rahguzar ko dekhte haiñ

ajab safar hai ki bas ham-safar ko dekhte haiñ

na manzilon ko na hum rahguzar ko dekhte hain

ajab safar hai ki bas ham-safar ko dekhte hain

is safar meñ niiñd aisī kho ga.ī

ham na so.e raat thak kar so ga.ī

is safar mein nind aisi kho gai

hum na soe raat thak kar so gai

kabhī merī talab kachche ghaḌe par paar utartī hai

kabhī mahfūz kashtī meñ safar karne se Dartā huuñ

kabhi meri talab kachche ghaDe par par utarti hai

kabhi mahfuz kashti mein safar karne se Darta hun

nahīñ hotī hai rāh-e-ishq meñ āsān manzil

safar meñ bhī to sadiyoñ kī masāfat chāhiye hai

nahin hoti hai rah-e-ishq mein aasan manzil

safar mein bhi to sadiyon ki masafat chahiye hai

vo lutf uThā.egā safar kā

āp-apne meñ jo safar karegā

wo lutf uThaega safar ka

aap-apne mein jo safar karega

ek safar vo hai jis meñ

paañv nahīñ dil thaktā hai

ek safar wo hai jis mein

panw nahin dil thakta hai

maiñ safar meñ huuñ magar samt-e-safar koī nahīñ

kyā maiñ ḳhud apnā hī naqsh-e-kaf-e-pā huuñ kyā huuñ

main safar mein hun magar samt-e-safar koi nahin

kya main KHud apna hi naqsh-e-kaf-e-pa hun kya hun

abhī safar meñ koī moḌ hī nahīñ aayā

nikal gayā hai ye chup-chāp dāstān se kaun

abhi safar mein koi moD hi nahin aaya

nikal gaya hai ye chup-chap dastan se kaun

safar meñ aise ka.ī marhale bhī aate haiñ

har ek moḌ pe kuchh log chhūT jaate haiñ

safar mein aise kai marhale bhi aate hain

har ek moD pe kuchh log chhuT jate hain

raah āsāñ dekh kar sab ḳhush the phir maiñ ne kahā

soch liije ek andāz-e-nazar merā bhī hai

rah aasan dekh kar sab KHush the phir main ne kaha

soch lije ek andaz-e-nazar mera bhi hai

rah-e-talab meñ kise ārzū-e-manzil hai

shu.ūr ho to safar ḳhud safar kā hāsil hai

rah-e-talab mein kise aarzu-e-manzil hai

shuur ho to safar KHud safar ka hasil hai

kisī ko ghar se nikalte hī mil ga.ī manzil

koī hamārī tarah umr bhar safar meñ rahā

kisi ko ghar se nikalte hi mil gai manzil

koi hamari tarah umr bhar safar mein raha

safar hai shart musāfir-navāz bahutere

hazār-hā shajar-e-sāya-dār raah meñ hai

safar hai shart musafir-nawaz bahutere

hazar-ha shajar-e-saya-dar rah mein hai

maiñ apnī añgusht kāTtā thā ki biich meñ niiñd aa na jaa.e

agarche sab ḳhvāb kā safar thā magar haqīqat meñ aa basā huuñ

main apni angusht kaTta tha ki bich mein nind aa na jae

agarche sab KHwab ka safar tha magar haqiqat mein aa basa hun

aa.e Thahre aur ravāna ho ga.e

zindagī kyā hai, safar kī baat hai

aae Thahre aur rawana ho gae

zindagi kya hai, safar ki baat hai

merī taqdīr meñ manzil nahīñ hai

ġhubār-e-kārvāñ hai aur maiñ huuñ

meri taqdir mein manzil nahin hai

ghubar-e-karwan hai aur main hun

kabhī tamām to kar bad-gumāniyoñ kā safar

kisī bahāne kisī roz aazmā to sahī

kabhi tamam to kar bad-gumaniyon ka safar

kisi bahane kisi roz aazma to sahi

maiñ apne aap meñ gahrā utar gayā shāyad

mire safar se alag ho ga.ī ravānī mirī

main apne aap mein gahra utar gaya shayad

mere safar se alag ho gai rawani meri

Tilism-e-ḳhvāb-e-zuleḳhā o dām-e-barda-farosh

hazār tarah ke qisse safar meñ hote haiñ

Tilism-e-KHwab-e-zuleKHa o dam-e-barda-farosh

hazar tarah ke qisse safar mein hote hain