Sher on Aanch

maiñ sote sote ka.ī baar chauñk chauñk paḌā

tamām raat tire pahluoñ se aañch aa.ī

main sote sote kai bar chaunk chaunk paDa

tamam raat tere pahluon se aanch aai

kabhī ishq karo aur phir dekho is aag meñ jalte rahne se

kabhī dil par aañch nahīñ aatī kabhī rañg ḳharāb nahīñ hotā

kabhi ishq karo aur phir dekho is aag mein jalte rahne se

kabhi dil par aanch nahin aati kabhi rang KHarab nahin hota

aañch aatī hai tire jism kī uryānī se

pairahan hai ki sulagtī huī shab hai koī

aanch aati hai tere jism ki uryani se

pairahan hai ki sulagti hui shab hai koi

shāyad ab bhī koī sharar baaqī ho 'zeb'

dil kī raakh se aañch aatī hai kam kam sī

shayad ab bhi koi sharar baqi ho 'zeb'

dil ki rakh se aanch aati hai kam kam si

badan kī aañch se sañvlā ga.e haiñ pairāhan

maiñ phir bhī sub.h ke chehre pe shaam likhtā huuñ

badan ki aanch se sanwla gae hain pairahan

main phir bhi subh ke chehre pe sham likhta hun

chāhat kī tamannā se koī aañch na aa.ī

ye aag mire dil meñ baḌe Dhab se lagī hai

chahat ki tamanna se koi aanch na aai

ye aag mere dil mein baDe Dhab se lagi hai

dard kī aañch banā detī hai dil ko iksīr

dard se dil hai agar dard nahīñ dil bhī nahīñ

dard ki aanch bana deti hai dil ko iksir

dard se dil hai agar dard nahin dil bhi nahin

dam-e-visāl tirī aañch is tarah aa.ī

ki jaise aag sulagne lage gulāboñ meñ

dam-e-visal teri aanch is tarah aai

ki jaise aag sulagne lage gulabon mein

ḳhvāhishoñ kī aañch meñ tapte badan kī lazzateñ haiñ

aur vahshī raat hai gumrāhiyāñ sar par uThā.e

KHwahishon ki aanch mein tapte badan ki lazzaten hain

aur wahshi raat hai gumrahiyan sar par uThae